Editorial, April 25, 2022 : Lawngtlaiah hian sports discipline hrang hrang a awm a, kan phak tawk ang zelin hma kan la theuh. Amaherawhchu, a district ang zawnga sport lama kan thlen san theih lohna chhan leh hma kan sawn theih lohna chhan pakhat chu mahni kan in discipline peih lova, discipline hnuaiah kan awm peih lo a ni.

Sport discipline hrang hranga player-te hmakhua ngaiin leh hmasawn nan hruiatu ten tournament an buatsaih thin a, hei pawh hi kan hmang tangkai thiam lo. Tournament a awm dawn chauh a training/practise nei, tournament a zo a, peih leh chuang miah lo, hetiang imfiammi hi a tam zawk kan ni. Sport lama hlawhtlinna nei tur chuan inthunun a ngai, chutiang mi chu an hlawhtling thin. Hruaitute kan dem ngawt thin a, a nihna takah chuan player-te hian hruaitute dream hi kan thlen tir phak lo zawk a ni. Football chungchangah hruaitute hmalaknain Aizawl lamah an trial a, an tling ta ngei a. Amaherawhchu, thununna hnuaiah an awm peih lova, hotute duhsak tlaka an awm thin loh avangin ni hnih hnu leka kan inhmu leh mai thin.

Tin, Lawngtlaia football tournament a awm reng rengin Prize Money-ah kan buai thin. Prize Money hi kan khelh chhan a nih chhung chuan hmasawnna tak tak kan nei ngai lovang. Tournament hi kan theihna lanchhuah tirna tur leh kan hmasawnna zelna tura kalkawng pakhatah kan hmang zawk tur a ni. Prize money tam tur chuan a sum thahnem tak a ngai a, sponsorship mawm tak hmuh a ngai bawk. Tournament vawikhat buatsaih nana sum awmte hi Prize Money-ah a hman vek thei loh a, referee-te hlawh, ei leh in, first-aid leh thil dang tam takah a kal ve bawk a ni.

English Premier League champion hian season liamta khan £153.9m an hlawh a. La Liga champion-in season liamtaah €158m hlawhin, Ligue 1 champion-in season liamtaah €60m hlawhin 1. Bundesliga champiom-in €108m an hlawh. Season liamtaa Champions League champion-in €20m an hlawh bawk.

Kum 2017 khan Brazil forward Neymar chuan PSG a pan a, a transfer fee kha £198m (€222m) a ni. Hei hi EPL champion-in an dawn aiin a tam zawk. A awmzia chu, prize money hi chu competition/tournament tihlutu a ni a, heta tanga inchherchhuak thiamte hi an vannei thin a, inchherchhuahna hmanruaah an hmang thin bawk.

Tun CEM LADC Football Running Trophy khelh mekah a hmawrbawk hnai a ni a. Referee leh Match Official-te thutluknaa lungawi zan lo khuate kan awm a, dik intih ve ve laite pawh a awm bawk. Engpawhnise, mihring hi tisual thei leh hre dik lo vek thei kan ni. Kan thahnemngaihna kan tawngchhuahte hi hmasawn nan hman tum zawk ila. Khawl thluak nei, Video Assistant Referee meuh pawhin a tisual thei a, kan inhriatthiam tlan a, fimkhur nan leh in zir zel nana kan hman erawh a tul hle. 

Post a Comment

Powered by Blogger.