Lawngtlai, April 25, 2022 : Vawiin khan Lawngtlai District chhunga khaw hrang hrang thlan chhuah bik 31-ah kum tina April ni 25-a hman ṭhin World Malaria Day chu hman a ni. He'ng khaw hrang hrangah te hian Mizoram State Rural Livelihoods Mission (MzSRLM) hnuaia Self Help Group te nen ṭang kawpa hun hman ho niin, thosi pian theihna tihbo (source reduction), malaria laka himna tur inzirtirna (awareness campaign), thosilen chiah (bed net impregnation) leh sikserh (malaria) enfiah runpui buatsaih tea hun hman a ni.

Lawngtlai District-a World Malaria Day puala hun hman pui ber chu CMO Conference Hall, Lawngtlaiah buatsaih niin, ANM School, Lawngtlaia zirlai leh zirtirtute leh health department-a thawktu ṭhenkhat nen hun hman a ni a. District Malaria Officer Dr S. Thaizi chuan hun kaihruaiin, World Malaria Day hman ṭan a nih dan leh hman a pawimawhzia te a sawi fiah a. Lawngtlai District chu malaria tam em emna, hun rei tak malaria buaipui tawhna District a nih avangin mipui lam leh thawktute tan pawh ngaia neih mai a awlsam hle a, chumi avang chuan infuih tharna leh inzirtir tharna hun atan World Malaria Day hman hi a pawimawh zual hle a ni, a ti.

Lawngtlai Chief Medical Officer Dr LP Malsawma chuan malaria chu ngaihthah chi a nih loh thu sawiin, malaria tam hun a nih chhoh dawn avangin inven fimkhur a pawimawh tak zet tih a sawi a. Thosilen zar hnuaia mut ngei ngei chu malaria laka invenna ṭha ber a ni tih hria a, uluk taka thosilen hmang hram hram turin District mipuite a chah a ni.

Lawngtlai District chu Mizorama malaria tamna ber District niin, kum 2020 chhung khan mi 40,789 enfiah aṭangin malaria vei (positive) mi 4,183 hmuh chhuah an ni a. Malaria vanga nunna chan mi pali an awm a ni. Kum 2021 khan mi 34,080 enfiah aṭangin malaria vei mi 2,238 hmuh chhuah niin, malaria vanga nunna chan mi pathum an awm bawk a. Kum 2022-ah March thla thleng khan malaria vei mi 150 hmuh chhuah an ni tawh bawk. 
 
District Consultant chuan Lawngtlai District chhunga Myanmar aṭanga raltlante hnenah pawh a theih chin chinah thosilen sem a nih deuh vek tawh thu sawiin, mipui nawlpui zingah pawh uluk taka thosilen hmang tura inzirtir uar a la ṭul hle a ni, a ti a. Lawngtlai District-ah kan awm emaw, kan zin emaw a nih chuan khawsik tawh phawt chuan a rang thei ang berin malaria enfiahtir zung zung i la, chu chuan malaria vanga thihna pawh min pumpelhtir dawn a ni, a ti.

Post a Comment

Powered by Blogger.