Lawngtlai, April 12, 2022 : Vawiin April 12, 2022 khan Lai Autonomous District Council Board of School Education buatsaihin March 15, 2022 a LADCBSE in Common Questions Examination result (Class -IV leh Class - VIII) a tih chhuah taka top ten-a lang chinte hnenah Incentive Cash Award sem a ni. He hun hi Pu Andrew Laltlanzara EM (MS) etc., LADC leh Controlling Authority LADCBSE ni bawk chuan khuallian niin a hmanpui.
Vawiina CQE 2021-2022 Class IV leh Class VIII top 10 a langte hnenah Incentive Cash Award sem dan chu hetiang hi a ni. 1st - Rs. 12000, 2nd - Rs. 10000, 3rd - Rs. 8500, 4th - Rs. 8000, 5th - Rs. 7500, 6th - Rs. 7000, 7th - Rs. 6500, 8th - Rs. 6000, 9th - Rs. 5500, 10th - Rs. 4500
Khuallian Pu Andrew Laltlanzara, EM (MS) chuan, Covid-19 hripui leng avanga harsatna hrang hrang karah LADCBSE thawktute leh Education Department Officer-te leh thawktu zawng zawng ten theihtawp an chhuahna azarah examination buatsaih thei a ni chu lawmawm a tih thu a sawia. Hei hi kan ram leh hnam tan a nih mai bakah, Zirna kawnga thawktute thahnemngaihna chu fak a phu thu sawiin, hmalam hunah pawh theihtawp chhuah thar zel turin a chah bawk.
Pu Andrew Laltlanzara, EM chuan Incentive Cash Award sem chu a vawikhatna a nih thu sawiin, 'zirlaite hi kan ram hruaitu turte in la ni dawn a, hun engemaw ti atang khan Central leh Cilvil Service lamah hian kan lang ta meuh lova, chuvang chuan LSA te nen pawh tangho ila, hmalakna mumal tak kan neih a tha hle dawn a ni' a ti a. Zirlaite pawhin theihtawp chhuaha tanlak a ngaih thu leh, tunlai khawvel changkanna leh thiamna te pawh hi hmang tangkai zel turin a chah bawk. Pu Andrew Laltlanzara chuan 'Zirlai kan nih chuan taimak hi a pawimawh a, thiam thei tak nih a that laiin taima taka bei hram hram te hian hlawhtlinna an chang thin a, nu leh pa te pawhin tan kan lakpui a ngai hle a ni' a ti.
Pu Andrew Laltlanzara chuan zirtirtute tanlak a ngaih thu sawiin, 'Zirtirtute pawh tan ila thar leh teh ang u, zirtirtu hna hi eizawnna leh hlawh lakna maiah ngai lo ila, Ram leh hnam tana thawk kan ni a, zirlaite hi kan ram leh hnam hruaitu turte an la ni dawn a, chuvang chuan, mi puitling leh chhawrtlak ni turin kan chherchhuak ngei tur a ni. Kuminah phei chuan mipuiin sawrkar School an bawh nasa hle a, dawhkan leh thutna pawh siam belh a ngai hial a ni, chuvang chuan Zirtirtu ten mawhphurna kan nei sang hle' a ti bawk.
Pu H. Lalramenga, Executive Secretary, LADC pawhin thu sawiin, 'Zirlaite chu hlawhtling tur chuan, taimak leh thawhrim a ngai a, a thiam thei ber nih ngawt a tawk lova, taima taka hlawhtling ngei tura kan beih hram hram a tul a, kan zirlai tibuai thei Ruihhlo leh thatchhiatnate, kan nuam tih zawng ringawt buaipui thin lo turin ka fuih duh che u a ni' a ti.
Pu A. Zaithanga Secretary, LADCBSE chuan, 'kum tharah pawh hetiang programme hi kan la nei leh zel dawn a, Pu V. Zirsanga, CEM LADC leh Pu Andrew Laltlanzara, EM (MS) te thahnemngaihna zarah Teachers Award pawh sem tum a nih thu a ni' a ti..
He Programme-ah hian Pu F. Lalhmachhuana, Education Officer (MS) LADC te, LADC Officer, Samagra a thawktute, Middle leh Primary School zirtirtu thenkhat bakah Board member-te leh zirlai nu leh pa te an tel a; Pu J. Vantluanga, President LADCBSE in hunserh hmangin, Pi F. Laldawmdingi, Academic Officer chuan lawm thu sawina hun a hmang bawk.
Post a Comment