Siaha, Aptil 13, 2022 : Nimin khan Siaha District Headquarters ZPM Office-ah MADC Inthlan lo awm tura ZPM Manifesto tlangzarhna leh mi thar lawmluhna hun hman a ni. 

Pu K. Sapdanga, Working President, General Headquarters chuan MADC Election Manifesto tlangzarhna leh mi thar lawmluhna hun a hmang a; Pu BS Lualai, GS, ADC Congress leh Pu David NT Beizi, GS, ADC BJP te ZPM-ah lawmluh an ni. 

An manifesto ah hian MDC-LADS Fund hman dan ruahmantu Local Development Committee din leh Fund zawng zawng (100%) mipuite tana hman vek te, MDC zawng zawngte thla tin vawi 1 aia tlem lo bial fan chhuah te, Council Library hi Zirlaite tan Competitive Exam inbuatsaihna tlaka tihchangtlun te, MADC hnuaiah thalaite hmasawn nan Youth Commission din te, Education system siamtha tura hmalak te, Truck terminal tha tak siam te, MADC hnuaia sorkar Office Furniture te ram leilung fate siam chauh hman te, Agricultural products tihpun a nih theih nana hmalak te, Palâ Dil leh Beino lui khualzinte hip tur leh tlawh chakawm taka siam te, MADC inrelbawlna fel zawk a awm theih nan Administrative Reform Commission din te, MADC hnuaia Department te a nih dan tur ang taka kalpui te leh, The Schedule Tribes Order 1950 (Mizoram ST List No.8)-a Mara hnam ‘Lakher’ ti-a la inziak hi ‘Mara’ ti-a thlak tura hmalak te a tel a ni. 

Pu Sapdanga chuan, ZPM innghahna ‘Kalphung Thar’ kan hmu nghal a, sawrkarna kan chang a nih chuan heng kan manifesto-te hi kan tihlawhtling ngei ngei dawn a ni,” a ti bawk.

ZPM hian vawiin khan MADC inthlan atan an party official candidate an puang nghal.

1-TOKOLO : Alfred K. Daolai
4-LAKI : Pasa T Azyu
13-SAKOA : Hc. Ezara
16-NOH AOTLAH : Tumhranga
18-SIAHA NORTH-I : BS Lualai
20-SIAHA SOUTH-I : NT. Lalringliana 
23-SIAHA EAST-II : V. Zuala
24-SIAHA WEST-I : David NT Beizi

Post a Comment

Powered by Blogger.