Lawngtlai, April 12, 2022 : Nimin, April 11, 2022 khan Govt Lawngtlai College Hall-ah Pu K. Hre Kung, President Lawngtlai Academy of Letters leh Sangau West Bial MDC ni bawk chu khuallian niin Lorrain Vanlalrema ziah 'Ka THIPUI' tih chu a tlangzarh.

Pu K. Hre Kung chuan, lehkhabu ziah hi thil namai lo tak a ni a. Taimak leh tuarchhel a ngai tak zet a ni, a ti a. 'Laifate te Literature-ah kan sang lo hle a, lehkhabu ziak pawh kan tam lo hle a ni. Kan Literature tih hausak anih zel theihna turin tunlai thangtharte hian tan kan lak thar lehzual a ngai a ni' a ti bawk. Tuna lehkhabu kan tlangzarh tak pawh hi khawrpum a nih hma hian a ziaktu hian harsatna namen lo a tawk a. Mahse, chu harsatna chu inhneh tir duh lovin, lehkhabu tha tak a lo ziah theih phah a ni, a ti a. Tunlai thangtharte zingah lehkhabu chhiar peih lo kan tam ta hle mai. Hemi kawngah pawh hian tan kan lak a ngai tak zet a ni, tiin kalkhawm te chu lehkhabu chhiar lamah tan la turin a chah bawk a ni.

Lorrain Vanlalrema hian Govt. Lawngtlai College a B.A IV Sem (Mizo) zirlai niin, kum 21 chauh a ni. A lehkhabu ziah hi phek 217 a chhah niin Songbird Publication, Aizawl in an tihchhuah a ni. 

Govt. Lawngtlai College aiawha thusawitu Vice Principal Associate Professor Pu LH. Mawia Hnyaloom chuan, zirlai nih lai atanga lehkhabu tha tak mai tlangzarh thei tura buatsaih tu chu fakawm a tih thu a sawi a. Hetiang lehkhabu tha tak ziak tur hian hun awl neih that a ngai hle a. Lehkha zir hun chhung bakah a hun awl te hmang tha a, lehkhabu ziak thei tu hi zirlaite pawh hian kan entawn a ngai hle a ni, a ti 

Lehkhabu thlirlawkna hi Asst Professor Pu David H. Zothanpuia, Deptt of Mizo Govt. Lawngtlai College in a nei a. Upa B. Lalremlenga, Bethel Veng in hunserh a hmang a. He lehkhabu tlangzarh inkhawm hi Pu Elvis Lalthangzuala, MJA Vice President in a kaihruai ve thung a ni.

'Ka thipui' tih lehkhabu ziaktu Lorrain Vanlalrema pawhin thusawina tawi a nei bawk a ni 

Post a Comment

Powered by Blogger.