Aizawl, April 19, 2022 : Health Minister Dr R. Lalthangliana chuan nimin khan Zoram Medical College, Falkawn tlawhin hmasawnna ruhrel thawh mek chi hrang hrang a en.
Minister hian Academic Block (New Teaching Block) a tlawh hmasa ber a, he building hi cheng vaibelchhe 103.41 sengin M/S.MP.Khaitan ten ni August ni 8, 2018 atanga an sak tan tawh a ni a, tunah hian floor thenkhat chiah luah tawh niin June ni 6, 2022 a luah kim hman tura beisei a ni.
Minister hian ZMC a OPD building block thar sak mek tlawhin, Medical Superintendent pisa sak zawh thar te, Neo-natal ICU leh Pediatric ICU bakah Operation Theatre te a tlawh bawk a ni.
A hnuhnung berah Falkawna Indiam Medical Association (IMA) building sak mek a tlawh bawk a, IMA buildingah hian Guest Room, Conference Hall, Cabin leh Vehicle Parking Lot awm tura ruahman niin, IMA member daktawr ten an pawisa an thawhkhawm atanga sak a ni a. Minister hian room hrang hrang luah theih mai tura duante fangin, building sak dan leh hmun hmate a enfiah a ni.
Minister hi Pu R. Lalramnghaka IAS, Health Secretary, Dr.F. Lallianhlira, Principal Director, Er.H.Lalfakzuala EE, Health ten tawiawmin ZMC-a thawktuten an lo dawngsawng a ni.
Post a Comment