Siaha, March 12, 2022 : Nimin khan Mara te Kut zinga ropui ber LYUVA KHUTLA lawmna chu MADC bultumin MADC kawt zawlah neih a ni.
He hunah hian MADC CEM hlui Pu S Vadyu chu Kut Pa a ni a, Pu S Vadyu chuan, Mara hnam te pawnlam mi in min hmuhdan hi The Lakhers N.E Perry ziah lehkhabu hrang hrangah hmuh tur a awm. Mara hnam te hi hnam huaisen,taima, rinawm leh mikhual duat thiam tak, kan pumrua te pawh kan chhehvela hnam dangte aia tha in min ziak a ni. Chuvangin kan Kut hman te hian, kan nihna min hriatnawn tir se, kan pi leh pu te nunze mawi leh tihdan tha chhawmnung zel turin chona thar min pe mawlh rawh se, a ti.
Pu Lalsangliana, District Bawrhsap pawhin thu sawina hun a hmangin, Vawiina Lyuva Khutla lawmna huna thusawi ve tura sawm ka ni hi ka lawm hle a ni. Vawiina kan Kut hman hi kan intihlimna hrang hrang leh kan zai leh lamah te tawp mai lo se, Kan Pi leh Pu te nunze mawi min chhawmnun tirtu hmanraw tangkai taka kan hman theuh theih nan duhsakna ka hlan a che u, a ti.
Nimina Lyuva Khutla lawmna-ah hian Mara hnam lam zinga langsar zual, heng: 1) Sawlâkia
2) Khohcheinô Lâ
3) Awkhy Lâ te chu Art & Cultural Emompanel Group ten an entir a. Vocational School of Education Fashion Designing Institute,Siaha ten Hnam incheina entirna (Cultural Dress Show) an entir bawk.
Thusawi leh Hnamlam entirna kar lakah hian Siaha district Zaithiam ten mipui an awi reng bawk a ni.
Nimin hun hmanah hian Myanmar Idol David Lai leh Miss Mizoram Zirsangpuii te pawh an tel ve a ni.
Post a Comment