Rauthla, March 12, 222 : Barak Bulletin-in a tar lan danin, Cachar Superintendent of Police (SP) Dr Ramandeep Kaur chuan Abub Ahmed Amzumdar an man tawh thu nemnghetin, Cachar district-a Dholai Police Station-ah thu zawh fiah tura an kawl mek thu a sawi.

Cachar SP Dr Ramandeep Kaur kaihhruaina hnuaiah, Myanmar atanga Silchar kaltlanga kuhva rah tawlhnaa mawhphurhtu lian berte man chhuah tura hmalak a nih tan atangin, Abub Ahmed Mazumdar hi a awmna chin hriat theih loh turin a bibo a ni.

Abub Mazumdar hian Myanmar atanga Mizoram paltlang a, India-a dan loa kuhva rah tawlha sumdawnna a kalpui atangin zan khat thil thu-ah sumdawng hausa tawntaw a ni nghal a. Kuhva raha sumdawnna a kalpui hma hian hmun phiaha sumdawng a ni.

Abub Ahmed Mazumdar hian Mizoram Secretariat nen inkungkaihna tha leh nghet tak nei nia sawi a ni. He inkungkaihna hmang hian kuhva rah tawlha a sumdawnnaah chhiah chawi tur leh custom duty-te pumpelhin, dan loa kuhva rah tawlh a buaipui nia sawi a ni.

Hei bakah hian, Abub Ahmed Mazumdar hi ram hruaitu lawk tak tak, chief minister level thlenga inkungkaihna tha tak nei niin, chief minister Zoramthanga leh Assam chief minister Himanta Biswa Sarma te zan riah kila an inkawmnaah pawh sawm a ni a. Mazumdar hian April 29, 2019-a nupui a neih pawh khan Mizoram-a minister tel an awm thu tar lan a ni bawk.

February 2022 tir khan Cachar police te'n Silchar-a Itkhola-ah Abub Ahmed Mazumdar multistorey apartment an lo dap tawh a ni.

February 2022 atang khan Cachar SP Dr Ramandeep Kaur kaihhruaina hnuaiah dan loa kuhva raha sumdawngte dap chhuak a, man turin ‘All Out’ tia vuahin beihpui an thlak \an a. He beihpui thlakna kal zelah policeten Altaf Hussain, Zakir Talukdar, Zakir Hussain Laskar (Bagha), Nizam Uddin, Khalil Uddin te an man tawh a. An mi mante hi Abub Mazumdar hnuaia thawk vek an ni. Raaj Saha, Kartil Paul, Dipankar Deb, Anjan Paul te chu tan inah khung an ni tawh. 

Hetih lai hian, tun tum Assembly Budget session neih zawh takah khan Food, Civil Supplies & Consumer Affairs department changtu K. Lalrinliana’n ziaka CLP leader Zodintluanga Ralte zawhna a chhan danin, Commerce & Industries department atanga thu an dawn dan chuan, MNF sorkar hnuaiah Zoram Industrial Development Corporation Limited (ZIDCO) kaltlanga buhfai supply-tu mi pariat zingah Abub Ahmed Mazumdar hming a lang a. Ani hi M/S Agri Fresh Trading Co., Silchar tia a firm hming tar lan a ni bawk. 

Post a Comment

Powered by Blogger.