Siaha, March 02, 2022 : Mara Autonomous District Council (MADC) hnuaia MDC inthlan lo awm tura hman tur Draft Electoral Roll chu nimin khan Siaha District Election Officer Pu Lalsangliana'n a tlangzarh.
Pu Lalsangliana chuan inthlanna thianghlim leh fel fai nei tur chuan E/Roll atanga bul tan that a ngai a, Draft E/Roll hi chutiang atana hmalakna hmasa ber a ni, a ti a. Draft E/Roll buatsaihna kawnga nasa taka thawktu Election Officer leh a thawhpuite bakah BLO te,VC te, tlawmngai pawl hrang hrang te leh Party aiawh te hnenah lawmthu a sawi a. MDC Inthlan an hmachhawn turah inthlanna thianghlim leh felfai a awm theih nan Tlawmngai Pawl te, Political Party aiawh te, BLO leh VC member te leh sawrkar hnathawk te tha taka an thawhho leh ngei a beisei thu pawh sawiin, chutiang atan chuan an tawiawmna leh thawhpuina a ngen nghal a ni.
Mara Autonomous District Council hnuaiah hian MDC constituency 25 awmin, Polling Station 81 a awm a. Draft E/Roll tlangzarh takah hian Mipa Voter 20,892 leh hmeichhe Voter 22,122 an awm a, a vaiin Voter 43,014 an awm mek a ni.“Vawiina Draft E/Roll tlangzarh taka sawisel tur nei leh hming thun belh tur neite tan tun thla ni 9 thleng hawn a ni a, tun thla ni 28-ah Final Roll tar chhuah a ni ang.
Post a Comment