Aizawl, March 02, 2022 : Governor Hari Babu Kambhampati-a'n nimin khan a chenna Aizawl Raj Bhavan-ah Mizoram Rural Bank (MRB) hotute a kawm a. He hunah hian Chairman Vadde Jaya Chandra, General Manager Pu C. Ramdinsanga leh hotu dang te an tel a. Governor hi Mizoram chhunga an hmalakna leh mipui tana an rawngbawlna te bakah an hmachhawp te an sawi pui a ni.
Governor Hari Babu Kambhampati chuan Pradhan Mantri Suraksha Bima Yojana (PMSBY) – kum khata Rs 12/- chauh senga Insurance scheme neih theih, chhiat tawh thulh a chhungte tana pawisa tam tak dawn theihna te, Pradhan Mantri Jeevan Jyoti Bima Yojana (PMJJBY) – kum 18 leh kum 50 inkar tana kum tin a Rs 330 senga insurance scheme neih theih, chhiat tawh thulh a chhungte tana sum tam tak lak theihna te leh central sawrkar hnuaia scheme tha tak tak te chu Mizoram mipui ten an la hre chiang lo a. Hei hi ngaihthah chi a ni lova, Mizoram mipui ten an chanvo dik tak an dawng ngei tur a ni a ti.
Tunah hian Mizoram mipui tam zawkin scheme tha tak atanga tanpuina an dawn tur te hi an hmelhriat loh avangin dil nachang an hre lo a. Bank lam te leh Nodal department hrang hrangin anmahni kaltlanga scheme awm thei mipui zirtirna an pek uar a ngai a ni a ti.
Governor Hari Babu Kambhampati chuan Mizoram chuan NGO te an chakin sawrkar an thlawp tha hle a. Heihi hman tangkai a tul thu sawiin Awareness campaign kalpuina atan bank lam an in daih loh pawhin tlawmngai pawl hrang hrang leh kohhran ten Bank ho chu thawhpui an inhuam ngei a rin thu pawh a sawi bawk a ni.
Pu Vadde Jaya Chandra tarlan danin tunah hian MRB chu District 11-ah an inzarpharh vek tawhin branch 97 an nei mek a ni. Kumin January thla thleng khan MRB CR Ration chu zaa 58.39 niin Mizoram a Bank ho CD Ratio chawh rual aiin a tam zawk daih a, Mizoram puma Bank a sumdahluh zawng zawng atanga chhut a zaa 29.88 chu MRB ah hian dahluh a ni a; Mizorama puma Bank atanga customer hnena sum puktir zata atanga chhut a zaa 33.36 MRB in a puk tir a ni. Tunah hian MRB hian nuai 2 sing 5 & 3,097 PMJDY account nei mekin he account nei tam ber a ni bawk a ni.
Post a Comment