Rauthla, March 12, 2022 : “ Vanduai vanga chhiatna thleng hi lo awm fo tawh thin a, tuna Lengpui Airport chei that mek chim erawh hi chu hnathawh chhiat vang liau liaua a ni tih a chiang hle,” Congress Legislature party member-ten an ti.
March 10, 2022 tlaia Lengpui Airport chei that mek building chim chu CLP Leader Zodintluanga Ralte hoin C. Ngunlianchunga leh Lalrindika Ralte ten nimin zing khan an tlawh a. Building chim hi slab chiah chim anga sawi a nih laiin an endikna atangin a bante pawh a tliak a, a bung a ni tih a hmuh theih tih an sawi.
“Hna a chhe em em a, a sakna hmanrua cement, balu leh rora a inchawhpawlh tha lo hle a. Kan tlawh lai ngei pawhin a la ro tha lo hle a ni. A ban leh beam-a rod hmante pawhin duhthu a sam loin a dik lo hle tih a lang bawk,” an ti.
CLP member-te hian Lengpui Airport chei that hna zawng zawng hi chief minister fachuam, Kamrula (Kamlova Chhangte - KR Construction) leh CM tupa, Zoramchhana te thawh vek a nih thu an sawi a. Hnathawhnaa tel ve ni ngeia ngaih theih turin CM pawhin Covid-19 avanga a zin chhuah ngam loh lai pawhin vawi tam tak a tlawh avangin, he chhiatna thlengah CM Zoramthanga hian mawh a phur thuk hle a an ngaih thu an sawi bawk.
Airport building sak lai mek sak dan that lohzia enin sak zawh a nih hmaa hna chhiatzia hriat chhuah a ni hian hnathawh tawh zawng zawngte pawh a tha tawk lo ang tih a rin theih avangin endik leh vek phawt an duh thu an sawi a. He chhiatna thleng hi dan anga chhui a, mawhphurtute lakah hremna lek kawh ngei ni se tih chu an ngaihdan a nih thu Congress party chuan an sawi.
Lengpui Airport-a chanchinbu mite hmaah thu sawiin CLP Leader Zodintluanga Ralte chuan, “Mizoram hmasawnna atana project lian tak hi an thawh tan kan hriat tirh tangin Mizoram mipuiten kan dem nasa hle a. Pawisa pawh a awm hma, work order pawh pek a nih hmain an duhsak zawng an thawhtir mawlh mawlh a. A hmunah ngei kan han en a, an hnathawh a chhe em em a, cement pawh awm mang loin a inchar tha lo em em bawk,” a ti.
Chief minister-in a duhsak em avanga huangtau taka siam a nih vanga chhia a nih thu sawiin, “Congress sorkar lai khan, Pu Ruatkima, tuna RD Minister ni tain lei chimte tlawhin, huai takin, ‘Sorkar hnathawkte mawh a ni lo, a department changtu chief minister mawhphurhna a ni a, moral responsible lain a bâng ngam tur a ni,’ a ti thin a. Tunah hian PWD changtu Chief Minister Pu Zoramthanga hi bâng turin a nawr ngam leh dawn em tih hi ka zawt a ni,” a ti bawk.
CLP team hi MPCC Media Department hotute leh MPYCC hotuten an tawiawm a ni.
Post a Comment