Lawngtlai, March 29, 2022 : Vawiin March 29, 2022 khan a ni thumna atan LADC Budget Session chu Pu VL. Hmuaka, Chairman kaihhruaina hnuaia neih chhunzawm a ni.

Pu T. Zakunga, Vawmbuk bialtu MDC zawhna chhang Pu BN. Thangpuia, Art & Culture changtu EM chuan Hlukhla Kut hman nan budget-ah pawisa dah a nih laia Hlukhla Kut hman a nih loh chhan chu Covid-19 inkhuahkhirhna avang a nih thu a sawi.

Zawhna kal zelah Dr. Lorrain Lalpekliana Chinzah, Chandmary bialtu MDC chuan Hlukhla Kut chu kum 2017 atanga hman tan a nih thu leh kum 2022 thleng hman a nih thu a sawi a. Budget-ah pawh dah zel a ni a ti. Hetih lai hian Ministry thar a pian hnuah Hlukhla Kut hi hman a la ni lo tih a sawi a, budget-a dah a ni chunga Hlukhla Kut hman a ni lo chu pawi a tih thu a sawi a. Mizoramah pawh Covid-19 hri a len laiin kuminah Chapchar Kut hman a ni tih a sawi a, Hlukhla Kut hi hmang ngei turin sorkarin hma la se a duh thu a sawi.

BN Thangpuia chuan Hlukhla Kut hman nana Budget-ah nuai 450,000 dah a nih thu a sawi a, Covid-19 avanga Hlukhla Kut hman theih a nih loh avangin LADC Finance Department-in LADC mamawhnaah an hmang tih a sawi a, Art & Culture Department-ah hman a ni lo tih a sawi.

Pu V. Zirsanga, CEM, LADC chuan Mizoramah Chapchar Kut chu a nawlpuia hman a lo tih a sawi a, official-te leh sawm bikte chauhin Covid-19 inkhuahkhirhna zawm chungin an hmang tih a sawi a. Hlukhla Kut atana budget-a sum dah chu sorkar sum indaihlohna avangin sorkar mamawhna zawnah hman a ni tih a sawi bawk.

Post a Comment

Powered by Blogger.