Aizawl, March 29, 2022 : Department of Information & Public Relations chuan an department din kum 50-na nimin khan I&PR Auditorium ah an lawm a. Chief Minister Pu Zoramthanga leh I&PR Minister Pu Lalruatkima ten an hmanpui.
Chief Minister chuan Golden Jubilee pual thuziak hawngin, Souvenir a tlangzarh bawk a. Tunlai hunah information a chak tawhin, thu pawimawh puanchhuah dan kawng chi hrang hrang a tam leh awlsam tawh dante a sawi a. Chief Minister chuan a tha zawnga mitinin kan hman thiam theih nan I&PR chuan mawhphurhna a nei a ti a. Mipuite hriattur a thuthar puanchhuah hi chiang tak leh ngil tak ni thin se tih sawiin, I&PR department chu chanchinbu mite nen innghenghnai taka thawkho an nih angin hetiang zawngah pawh hian mawhphurhna an neih thu a sawi. Chief Minister chuan I&PR Department thawktu indaihlohna te chu a hriatpui thu sawiin, sawrkar sum dinhmun a ziaawm hunah heng harsatna te hi sutkian a nih tur thu a sawi.
I&PR Minister Pu Lalruatkima chuan I&PR Department chu sawrkar policy hlawhtling taka a kal theih nana mipui hrialhhriat kawngah te, thuthar pawimawh tak tak puanzar te mai bakah, mipui leh sawrkar kara palai hna thawk, mipui mar dektu, hmasawnna hna tluan g taka a kal theih nan a mawhphurhna lian tak nei a nih thu a sawi a. I&PR Department a chakloh chuan sawrkar pawh a chaklo a ni, a ti.
District Council hunlai atang khan Information Officer ruat niin bul tan a ni a. Union Territory a nih hnu ah office building neiin, kum 1972 khan Information, Public Relations & Tourism (IPR&T) tiin department puitlingah hlankai a ni. Khatih hunlai khan Protocol leh Art & Culture department hi a la pianloh avangin tuna an hnathawh te hi a lo thawk thin a ni. Kum 1980 khan Printing & Stationery Department chu indangin, kum 1987 khan Tourism Department chu he department atang hian a indang leh a ni.
Tun dinhmunah Ministerial post 52 awmah post 30 luah a ni a, AVPA (Cameramen/ Protographer, etc.) post 63 ah 38 a ruak a, Group ‘A’ (Officer) post 48 ah 19 luah a ni.
Nimin I&PR Department Golden Jubilee lawmna inkhawm hi Director Pi Lallianpuiin a kaihruai a ni.
Post a Comment