Rauthla, March 03, 2022 : Mizoram BJP, Mahila hruaitu pawl nih Ukraine raltuknak hmun in rak tlungmi Durtlang Nungak Rebecca va hmuhtonnak an ngei i, hnemhnak bia an chimh.
Nk. Rebecca hi Ukraine University ah Doctor cawng cuahmah liomi a si i, Russia nih Ukraine a tuk tik ah Ukraine cu i kahdohnak hmun a si cang i cucaah ramdangmi kha anmah ram lei ah an tlun a hau cang. India zong nih India rammi sinak a ngeimi a thiarmi hna lak ah Nk Rebecca zong aa tel ve i Ukraine in Romania lei panh in Romania in Delhi a phan i, Feb 28 khan himbawm tein an khua Durtlang a phan.
PM Modi cozah nih cun Ukraine ram in rak phurhmi (tlungmi) pawl cu State cio nih thate in rak cohlang in rak hnem hna ding in le a bik in BJP hruaitu pawl nih rak dong hna in harnak an tonmi hna rak chingchiah piak in rak tong hna ding in theihternak a chuah.
Delhi in Rebecca a rak tlunnak kong le a address an rak pekmi hna pekzulh in MBJP Mahila hruaitu pawl nih hin Rebecca hi a khuasaknak Durtlang ah an va ton i, i kahdohnak hmun in a rak tlunnak kong le India cozah nih a rak buaipinak kong ah harnak le lungsilonak a ngei maw tiah an halmi bia cu : Rebecca nih India cozah sin ah lunglawmhnak chim cawk lo a ngei ti in le India rammi si a nuamh ning le ramdang cawngliomi students zong nih India Student cu an kan hngar ngai hna tiin a leh. Rebecca nih hin Chawva tampi i liam in mah umnak ram i rak hruai phantu PM Modi cozah sin ah lunglawmhnak bia rak chimpiak ding in Pi F.Lalremsangi cu a nawl fawn.
Post a Comment