Saitual, March 03, 2022 : Mizoram Football Association Cup 2022 chu March 29 hian Saitual District Football Association-in an thleng dâwn a, District FA 11-a football club thate inelna tur hi nimin (March 2) khan Saitual DC hoa rel fel a ni.
Mizoram Football Association (MFA) General Body Meeting chuan MFA Cup thleng turin Saitual DFA a thlang fel tawh a, March thlà chhunga khelh turin a ruat tawh bawk a; nimahsela Saitual District chhungah Covid-19 hripui a lem nasat avangin inbuatsaihna kalpui theih a ni lo a, inkhel practice pawh a la remchang lo.
MFA Cup atan hian DC kaihhruaina hnuaiah Organising Committee din nghal a ni a, anni hian a tul angin hri lêng dinhmun thlur chungin MFA Cup thlen theih dan tur an ngaihtuah chho dâwn a ni.
Tun dinhmunah Saitual District chhunga hmun eng emaw zarah hri lêng a la hluarin red zone a la ni a, hripui leng dinhmun thlir chungin ruahmanna siam a ni ang.
MFA chuan Saitual DC chungah lawmthu a sawi a, hun harsa tak karah footballer-te hma khúa ngaia inkhelh kalpui dan tur a ngaihtuahpui chu lawmawm an titakzet a, Saitual District mipuite pawh a vawi khatna atana MFA Cup hlawhtling taka thleng turin duhsakna säng ber a hlan nghal a ni.
MFA Cup hi District FA 11-a football club thate inelna tur a ni a, kum 2020-a Covid hripui len hnua Mizoram pum huap football inelna neih leh hmasak ber tur a ni ang.
Post a Comment