Lawngtlai, February 22, 2022 : Lawngtlai Bawrhsap Dr Andrew H. Vanlaldika hovin nimin khan a pisaah Lawngtlai District chhunga telecommunication service provider-te leh P&E hotute nen Lawngtlai District-a phone leh internet service chungchang leh a tihchangtlun theih dan tur sawi ho a ni.
Lawngtlai Bawrhsap chuan District chhungah telecommunication service tha leh rin tlak mamawhna a san hle thu a sawi a, sawrkar hna hrang hrang thawh nan te, zirlaite zirna chungchangah leh sumdawnna leh mimal chet velna kawng tinrengah internet connection neih that a pawimawh tih sawiin, hengah hian Lawngtlai District chu district hnufual bik a nih loh nana internet connection tha chhawp chhuah chu Lawngtlaia telecommunication service provider-te mawhphurhna a ni tih sawiin, service provider-te chu tan la deuh deuh turin a chah a ni.
Nimin sawihonaah hian service provider - BSNL leh Airtel ai awhte'n an dinhmun leh harsatna an tawh hrang hrang te an tar lang a. Service provider-te chu service thuam chak kawngah te, power backup tha neih kawngah te, tower din belh kawngah leh mipui harsatna rang taka chin fel kawngah te hma sawn tum tura chah an ni.
BSNL chuan an generator a chhiat avanga power backup lama harsatna an tawh mek thu an tar lang a. Airtel lam chuan power backup thuam chak tura hma lakna a kal mek thu leh Lawngtlai khawpuia mini tower pathum dah belh tura phalna an hmuh tawhah tower dahna tur mimal in chung hman tur an la hmuh loh avanga harsatna an tawh thu an sawi ve bawk.
Post a Comment