Lawngtlai, February 22, 2022 : Nimin khan Lawngtlai District Disaster Management Authority Chairman Dr. Andrew H. Vanlaldika chuan Mizoram sorkarin February 18, 2022 a a tihchhuah Covid-19 inkaihhruaina zulzuiin Lawngtlai District chhunga hman atan inkaihhruaina thar a tichhuak a, he inkaihhruaina hi thuleh awm hma atan hman a ni ang.
Nimina Lawngtlai District chhunga hman tur inkaihhruaina tharah hian inkaihhruaina hmasaa khapna thupek engemawzat thlahdul a ni a, Class X leh Class XII exam turte tan CAB zawm chungin school leh hostel hawn phal a ni a, class I atanga class IX leh class XI te tan school leh hostel khar a ni thung ang a, online in class an kal thung ang. College te pawhin online-a la kal tur a ni.
Kohhran inkhawm pawh biak ina leng thei zat zatve aia tam lovin chhun leh zanah inkhawm phal a ni a, zai erawh la khap a ni.
Picnic spot leh public park hawn phal a ni a, sports practices (indoor & ourdoor) te pawh phal a ni a, sports inelna, tournament (indoor & outdoor) chu entu awm lova neih phal a ni thung.
Beauty Parlour leh Spa, Gym leh Lumehna dawr hawn phal a ni a, mipui punkhawm, anniverssary leh birthday lawmna tur programme-ah chuan thuneitu hnenah phalna lak tur a ni bawk.
Lui kal, trekking, hiking leh adventure lam te pawh khapna atang hian paih a ni a, eichawp dawr, bazar, dawr leh restaurant te pawh hawn chhunzawm phal a ni bawk.
Hei bakah hian a dang ho chu inkaihhruaina hlui ang deuh vek a ni a, mipui nawlpui chetna office, hnathawhna, lirthei tlan dan, mitthi vuina leh a dangte chu a la pangngai a, la phal vek a ni.
Tin, Lawngtlai District huam chhunga zan tin 9:00 p.m - 4:00 a.m. inkara curfew puan chu, Red Zone huam chhung tih lohvah chuan nimin atanga thu leh awm hma atan hlih a ni. Red Zone huam chhungah erawh Dt. 28.02.2022 zanlai dar 12:00 thleng zan curfew hi a la awm ang.
Post a Comment