Lawngtlai, February 18, 2022 : Vawiin, February 18, 2022 khan Lawngtlai Bawrhsap Dr Andrew H. Vanlaldika hovin a office chamber-ah Lawngtlai khawpui chhunga man chawia bungrua/thil thawn (courier service) kalpui mek dinhmun leh hmasawnna tur te sawi ho a ni a. He hunah hian district administration official-te bakah, Legal Metrology Inspector, DIPRO leh, Lawngtlaia courier service kalpui mek Hannah Transport leh Lai Night Service ai awhte an tel.

 


Bawrhsap Dr Andrew H. Vanlaldika chuan khawvel hmasawnna thang chho zelah bungraw thawnna 'courier service' chu mipuiin an chhawr nasa tawh hle tih sawiin, mipui rawngbawlna tha tak kalpuitu courier service te chungah lawm thu a sawi a. Thil thawn man leh bungraw himna chungchangah mipui tana phurrit awm lo tur te, fimkhur tak leh mipui rawngbawlna rilru pu-a thil kalpui zel tum tur te'n courier service te chu a chah nghal a ni.

Courier service ai awhte chuan thil thawn an kalpui dan leh thil thawn man an lak dan te bakah, harsatna an tawh thin hrang hrangte an sawi a. Mipui leh courier service te tana himna tur leh kalphung tha zawk tur te, District hmasawnna atana rawtna hrang hrangte sawi ho a ni bawk.

Post a Comment

Powered by Blogger.