Aizawl, February 17, 2022 : Nimin khan Governor Pu Hari Babu Kambhampati an Tanhrila Mizoram University Campus-ah Ministry of Education leh UGC hnuaia EWS Scheme kaltlanga project hrang hrang thawhna tur lung a phum.
Larsap chuan University zinga la naupang pawl tak ni mahse, Mizoram University chu ramchhunga University tha ber te zinga mi a ni a ti a, hemi a thlen theihna atana theihtawp chhuahtute zawng zawng leh MZU enkawltute chu a chhuang hle tih a sawi a ni.
Larsap chuan zirna kalphung thar National Education Policy (NEP) 2020 a taka kalpuinaah pawh MZU chu hmahruaitu zingah an tel a, an tanlakna chu central sawrkar chuan an rawn hrechiang em em a ni, a ti bawk.“ National Education Policy (NEP) 2020 in a tum langsar tak chu ‘hna zawng’ aia ‘midangte hnathawhtur leh eizawnna siam thei’ mithiam tam zawk chherchhuah a, India ram chu khawvel thluakbur a siam a ni, a ti a. He policy hnuaiah hian India chuan khawvel pum huapa mi tangkai leh lehkhathiam chhawrtlak tam tak chherchhuah a tum rualin ei leh bar kawnga ram intodelh a siam pawh a tum tel tih a sawi a. Helai tak hi, he zirna kalphung thar in a tum ber leh a laimu a ni tih hre reng tur leh hemi lam hawia zirna kalpui zel turin MZU mithiamte chu a fuih a ni.
EWS hnuaia hnathawh turah hian MZU Campus-ah project pali leh Pachhunga University College-ah project pahnih a awm dawn a. MZU Campus-ah hian Boys Hostel pakhat, mi za awm theihna cheng vbc 10.7 senga sak tur, girls hostel pahnih mi 100 ve ve awm theihna tur cheng vbc 21.28 senna tur leh Academic Building pakhat cheng vbc Rs 15 Crore senga sak tur te a ni dawn a. Pachhunga University College-ah hian Academic Building pakhat cheng vbc 7.46 leh Boys Hostel pakhat, mi 50 awm theihna tur cheng vbc 5.85 senna tur te a ni dawn a. A vaiin cheng vbc 60.31 senna tur a ni.
Post a Comment