Lawngtlai District Magistrate-in ASF hri leng laka mipuite him tlan nana zawm tur thupek a chhuah


Lawngtlai 03.05.2024 : Tun lai hian Mizoram chhung hmun hrang hrangah vawk pul hri African Swine Fever (ASF) leng hmuh leh niin, Lawngtlai khaw chhungah pawh vawk thi a awm nual tawh tih report dawn a ni a. The Prevention and Control of Infectious and Contagious Diseases in Animals Act, 2019-in a sawi angin, Lawngtlai District chhungah vawk vulhte an lo him zawk nan leh mipuite an lo hrisel zawk nan Lawngtlai District Magistrate Pu Cheemala Siva Gopal Reddy chuan Section 144 CrPC 1973 tlawh chhanin May ni 1, 2024 khan heti ang hian thupek a chhuah.

"1. Lawngtlai District pawn/ram dang aṭangin vawk lak luh khap tlat a ni.

"2. Infected Area-a puan tawh reng reng aṭangin vawk leh vawksa aṭanga siam reng reng lak luh leh thawn chhuah khap tlat a ni.

"3. Vawk damlo reng reng talh leh hralh khap tlat a ni.

"4. Vawk talhtute'n AH&Vety Department-in a dam ṭha ngei a ni tih a hriatpuina (Certificate) nei chauhin an talh tur a ni.

"5. Vawk damlo thi an awmin, AH&Vety Department-ah hriattir ṭhin tur a ni.

"6. Vawk thi reng reng thuk takah bleaching leh chinai nen phum zel tur a ni.

"He thupek zawm lo chu Section 188 IPC dan hmangin hrem an ni ang."

Post a Comment

Powered by Blogger.