Aizawl, February 17, 2022 : MPCC chuan nimin khan thuchhuah siamin, COVID-19 Third Wave-in Mizoram a tuam mek a, Aizawl khawpui chhung bakah Mizoram hmun hrang hranga khua/veng tam tak chu Red Zone-ah puan kan ni leh ta a. February 15, 2022-a Aizawl DC-in Red Zone a puante inkaihhruaina a siam tharah chuan a hmuna awm chilhte tan hnathawh a phal a. Hei hi hnathawktu, a bikin Mizote tan harsatna thlentu a ni mek a. Mizoram a vai hna thawka awm tam tak chuan Theka a thawkin, a tul dan a zirin a hmunah an awm chilh thei zel a, hei hi Mizo hnathawktu tam tak tan chuan thil theih a ni ve lo va. Chuvangin, he kaihhruaina hi Mizo hnathawktute nekchepna a nih rualin, hnamdang hna thawktute tana hamthatna a ni bawk. Hnathawk a khuahkhirh sak, sumdawngte leh nitina inhlawhfate atangin hri a darh nasa bik tih finfiahna sorkarin a nei hek lo an ti.
MPCC chuan, Third wave a lo thleng ngei dawn tih a chian hnuah pawh Mizoram sorkarin inbuatsaihna mumal a nei lo tih sawiin,, a na zualte enkawlna tur leh CCC pawh a ruahman belh hek lo an ti a. Hetiang taka COVID-19 dona kawnga hlawhchham sorkar kan nei hi a pawi takzet a ni an ti bawk.
MPCC chuan COVID-19 dona kawnga ruahmanna fel tak siam duh lo, hri darh dan zirchianna mumal taka kalpui duh si loa mipuite, hnathawktute leh sumdawngte hrek zawnga MNF sorkar a kal leh thin chu tha a ti lo tih sawiin, ruahmanna tha zawk siam turin sorkar an phut a ni tih an sawi bawk.
Post a Comment