Rauthla Editorial, February 17, 2022 : Myanmar raltlan an pung zel a. Lawngtlai khawpui chhung Veng hrang hrangah In luah tur pawh a vang tan ta hle mai. Chutiang karah chuan sorkarin raltlan awmna tur mumal taka ruahmanna a la siam loh avangin khawtlang hruaitute'n harsatna an tawk mek a. Hri avanga harsatnain kiam lam a pan thei lova, raltlan buaipui an ngai bawk nen, harsatna namen lo an tawk mek a. Heng raltlante lo enkawl kawngah hian Ram mipuite tanrual a ngai hle mai.
Raltlan lokalte zingah Kohhran ngaihsak tak tak an awm laiin ngaihsak lem lo eng emaw zat an awm bawk a. Tin, Kohhrante pawhin anmahni lo bel tlattu te chu theihtawp chhuahin an lo chhawmdawl bawk a, hemi kawngah hian Kohhran pawh an chetha hle a. Khawtlang hruaitute harsatna pawh Kohhran hian a hrethiam hle a, sum leh pai ah pawh nasa takin an tanpui thin a ni.
Kohhran an chetha kan tih mek lai hian fimkhur-na pawh a ngai hle awm e. Raltlan zingah nau hlan tur nei an awm ngei dawn a. Tin, Baptisma chang duh pawh an awm ngei ang. Heng mite hi Nau hlan certificate leh Baptistma channa certificate pek ngei an ngai dawn a. Hei hi remchangah la in India khua leh tui nihna an fate chauh ni lo hian an nu leh pa te hian an beisei nghal mai ang tih pawh a hlauhawm ta viau mai. Hei hi ngun taka Kohhranin a ngaihtuah loh chuan raltlan kan tih mek lai hian an fate nau hlanna leh Baptistma certificate hmang hian India khua leh tui nihna chang zawngin Politician te behchhan a vote lo neih tum tlat pawh a awm theih dawn a. Chuvangin, Kohhran ho ten theihtawp chhuaha kan chhawmdawl kan tih mek lai hian fimkhur taka kan lo chhawmdawl a, an awm zel dan tur pawh kan ngaihtuah thiam a tul ta zet ani. Hei hi sorkar pawhin a ngaihven zui deuh loh chuan raltlan te zingah India khua leh tui nihna nei an pung nual ang tih pawh a hlauhawm tak zet a ni.
Post a Comment