Aizawl, February 28, 2022 : Congress Member C. Ngunlianchunga zawhna, 'Kelkang daia kuhva tawlhruk mantu kha Champhai DC nge Pi Maria CT. Zuali, MCS?' tih chu Home Minister Lalchamliana chuan Kelkang daia kuhva tawlh ruk mantu chu Pi Maria CT. Zuali, Deputy Commissioner, Champhai District a nih thu vawiin, February 28, 2022 a Assembly Budget Session-ah a sawi.
Zawh belhna chhangin Home Minister chuan Champhai DC laka FIR thehluh chungchangah sorkarin prosecution hmangin court-ah chhan tum emaw chhan loh tumna emaw a la nei lo a ti a. Hemi chungchang hi Law Department lamah exam turin a kal mek a ti. Home Minister chuan Sorkarin smuggling goods a phal loh thu a sawi a. Dan lova kuhva tawlh rute chu a theih chin chinah chawi tir emaw engemaw tia hrem a nih tur thu a sawi a, court-ah tumahin an la khing lova a hriat thu a sawi bawk.
Lalchamliana chuan nikum February 25, 2021 a Pu Zodintluanga'n Kuhva tawlhruk chungchang a sawina sawichhuakin, Central sorkarin lo dang rawh u an ti a. Mahse, Mizo ten an hlawkpui ve a lawm le kan ti a, kan mit kan siai tih a sawi a. Mahse, kuhva tawlhruk hi a serious zia leh a that loh thu kan hre telh telh a, khap duhna a lo awm a, tum hnih lai District tina DC hnenah khap turin hma kan la a ni a ti.
Kuhva tlawhruk dang turin Sailiamah leh Sairang ramah check gate pakhat ve ve an siam thu Home Minister chuan a sawi a. Tin, kuhva tawlhruk chungchangah thuah sorkarin Police lal an inrawlh tih hriatna a nei lo tih a sawi.
Pu Lalchamliana chuan kuhva tawlhruk titawp turin sorkarin hma a la tih sawiin, Chief Secretary kalchhuak ta hoin meeting vawi 3 lai neih a ni a, ka hoin vawi 2 neih a ni a, District tin DC leh SP te hnenah lo check a, kuhva tawlhruk a awm a nih chuan man turin thu kan pe tawh a ti.
Pu H. Biakzaua zawhna chhangin Pu Lalchamliana te chuan District Magistrate ten dan phal loh bungrua/sorkar khap thil chu an man theih thu a sawi a. amaherawhchu, a hmuna tihchhiat theihna an nei lo a ti a. An man hnuah case an siam ang a, court-in a ngaihtuah hnuah ti tura an tih angin an ti chauh tur a ni a ti.
Pu C. Ngunlianchunga chuan kuhva tawlhruk chungchangah hian Guwahati High Court, Aizawl Bench-ah case file a ni a ti a, Pu Lalchamliana chuan case file chungchang hi sorkar ang chuan kan la hre lo a ti.
Post a Comment