Lawngtlai, February 28, 2022 : Home Minister Pu Lalchamliana chuan Mizorama Fire Station 10 tihchangtlunna turin MHA ah project cheng nuai 4725 leh sing 5 man an thehlut tawh tih vawiin, February 28, 2022 a Mizoram Assembly Budget Session-ah a sawi a. Heng Fire Station tihchangtlun turte zingah hian Lawngtlai Fire Station a tel.
Vawiin Assembly Budget Session neih mekak Lunglei East bialtu Pu Lawmawma Tochhawng zawhna chhanga Home Minister Pu Lalchamliana'n a sawi danin, 15th Finance Commission-in India ram puma fire service tihchangtlun nan cheng vaibelchhe 1000 a pe a. Ministry of Home Affairs-in state tin hnena ruahmanna thehlut tura a hriattir angin, Mizoram Sorkar pawhin cheng nuai 4725.5 hu ruahmanna a siam a, nikumah thehluh a ni.
Home Minister chuan nikuma Lunglei leh a chhehvel, Lawngtlai leh Serchhip District-a kangmei nasa tak chhuak thelh nan Helicopter rawih a ni a ti a, hemi rawih man hi Vaibelchhe 3, nuai 25 chuang zet a ni a ti. Helicopter rawih man hi rin aia a tam avangin MHA ah Grant anga kalpui tura ngen a nih thu leh tun thlengin a chhanna an la hmuh loh thu a sawi. Hei bakah hian Pilot ei leh in, an riahna leh anmahni puihtute senso chu nuai 3 a ni a, hei hi rulh fel tawh a ni a ti bawk.
Sorkar laipuia MHA hnena sum dil hi building thar sak nan, kângṭhelh motor leh kâng ṭhelhna atana hmanraw mamawh leina atan hman tum a ni.
Fire & Emergency Services, Lawngtlai Fire Station chuan tun dinhmunah tuiah harsatna an tawk lo tih an sawi a, Lawngtlai Chandmary-ah Fire Hydrant pakhat a awm thu leh Fire Hydrant hi Lawngtlai khawpui hmun tam zawkah awm thei se an duh thu an sawi a. Lawntlai Fire Station-ah hian thawktu 10 an awm mek a, kangthelhna motor 2 an nei mek bawk.
Post a Comment