Aizawl, February 25, 2022 : Assembly Speaker Pu Lalrinliana Sailo, kawnglaihna tur sum tih chingpen naa tela puhna avanga eptu party ZPM leh Congress member-ten Assembly rorelnaa an tel duh loh thu an sawi hnuah, nimina Mizoram Budget Chief Minister Pu Zoramthangan a pharhnaah pawh an tel lo zui a, Chief Minister hian Budget pharh ni ah chuan member chu kim taka awm a duh tih sawiin eptu member te an chhuak chu pawi a tih thu a sawi a, thudik hriat duh chuan Court lama kal mai a that zawk thu a sawi.
Hetihlai hian, ZPM leh Congress Party te hian nimin khan a hrang ve ve a party committee kovin, Congress Party chuan an MLA-ten Speaker Pu Lalrinliana Sailo chu House hruai tlaka an ngaih loh avangin Dy. Speaker-in House kaihhruai rih se tiin House Leader, CM Pu Zoramthanga hnenah ngenna an thlen a. House Leader in Speaker hi a hum tlat avangin MPCC Political Affairs Committee rorel angin rorelna dik a awm theih nana theihtawp chhuah turin an MLA-te chu Budget session-ah an tel zui leh dawn a ni, an ti.
ZPM Party chuan House Leader beisei ang ngeiin eirute chhuitu tur leh hrem theitu, Lok Ayukta-ah he thil hi chhuichiang turin a thlen tawh a, enzui reng an tum tih sawiin Session chu hun pawimawh leh eptu ten rorelna hmun ngeia sawrkar khalhngil tura an au chhuahna hmun a nih avangin leh, a thlangtu bial mipuite aiawhtu an nih ang ngeiin ni hnih lai an lo chhuahsan chu tawk tawhin thu chhunzawm leh turin an rel tih an sawi a ni.
Post a Comment