Aizawl, February 25, 2022 : Chief Minister Zoramthanga chuan, Kamrula chauh lo pawhin contract hna lian tak tak an hmu tih a sawi a. Contract hna chu a nihna (frank) tak sawi chuan Contractor lo pawhin an thawk nasa a, hming a inziak tlar thep thup tih Finance Minister a nihna anga nimina Budget a pharh zawha Press mite a hmachhawnnaah a sawi.
PWD hnuaiah 1st Class contractor engemawzatin an thawk a, an hming hawh leh a taka an thawh te pawh a ni, hming hawhin kan hre theuh a. Kamrula pawh kan duhsak bik pawh a ni lo a, kan duhsak lo bik pawh a ni lo a, midang thawh pawh hi a tlar thui khawp mai, a ti bawk.
Eptu MLA - ZPM leh Congress member ten rorel inkhawm an tel loh chhan chungchang zawhna chu a chhang lo. Assembly Speaker-in kawng siamna cheng nuai 100 a ei nia sawi chungchang avanga eptu MLA ten House zahawmna vawnhim nan Speaker chu rorel kaihruai rih lova, Dy. Speaker-in kaihruai zawk tura an ngenna tihhlawhtlin a la nih loh avangin eptu MLA te hian House an chhuahsan leh a. Hemi chungchang hi tunlai Zoram titi a nih avangin sawifiah tura media ten CM an zawh lai hian, CM tawiawmtu minister Lalruatkima chuan, topic ni lo chu zawt zui lo turin a ngen a, CM chu hun tam zawk pe turin a ngen a, CM hian 'A ni leh aw,' tiin inkawmna hi a titawp zui a ni.
Post a Comment