Aizawl, February 17, 2022 : Mizo Students’ Union (MSU) General Headquarters, Aizawl chuan Kamrul Laskar Uddin Tribal Certificate, Kamlova Chhangte tih hminga awm cancel a nih theih nana hmalakna kal zelah February ni 18, 2022 ral hma ngeia chinfel a nih theih nan chak zawka hmalak a tum.
MSU chuan dik lo taka Tribal certificate Kamlova Chhangte inti hnena pek chhuah chu November ni 23, 2021 khan cancel turin Aizawl D.C hnenah ngenna a thehlut tih an sawi a, certificate neitu Kamrul Laskar Uddin pawh be pawpin, innawr buai ngai lova amah ngeiin Tribal Certificate a neih cancel dilna ziaka thehlut mai turin thurawn an pe a, Kamrul Laskar Uddin chuan a zin chhuah thu a sawi a. MSU ngenna pawh sawrkar lamin bawhzuiin inquiry pawh lak nghal niin, vanduaithlak takin Bawrhsap Pisa Pui kan avangin D.C lam hmalakna a khaihlak ta a ni an ti.
MSU chuan chawl lovin hma a la zui reng a, February ni 5, 2022 khan Kamrul Laskar Uddin pawh MSU Pisa Pui-ah lengin, MSU ruahmanna anga February ni 7 (Thawhtanni) ah D.C Office-a Tribal Certificate cancel tura ngenna lehkha thehlut turin a intiam a. February ni 7, 2022 a lo thlen chuan Kamrul Laskar Uddin chuan MSU hruaitute chu hna pawimawh a neih avangin lehkha a thehluh hman loh thu hrilhin, hemi hnu hian biak pawh theih loh leh chin hriat lohin vawiin thlengin a awm zui ta a ni.
MSU chuan, an hnena a intiam ang ngeia Tribal Certificate hi February ni 18, 2022 hmaa a surrender lo a nih chuan Kamrul Laskar Uddin zawn hna chu an thawk dawn a ni tiin thuchhuah an siam.
Post a Comment