Lawngtlai, February 17, 2022 : February 15, 2022 chawhnu khan Pu V. Zirsanga, Chief Executive Member, LADC chuan LADC hnuaia hnathawh mek thekhat; Feacal Sludge Treatment Plant, Phaikhang mual, XV Finance Commission sum atanga thawh mek, Lawngtlai khawpui bawlhhlawh paihna hmun tur leh Lawngtlai khawpuiin Thlanmual intawm (Common Cemetary) tur buatsaih mekte chu a hmunah kal chilhin, hmalak tawh chin leh hmabak la awmte a en a, hmalak zelna tura pawimawh te pawh a mawhphurtu Department te nen an sawiho nghal.
Pu K. Lalthanzara, Sr. Revenue Officer chuan ram awmdan leh an hmalak tawh chinte Report a pe a. Pu Malsawmtluanga Hlawnchhing, EE chuan Technical report pein, an hnathawh chin leh hmabak an neihte pawh chipchiar takin a sawifiah a, harsatna an neihte pawh CEM hnenah hian an thlen nghal bawk a ni.
Pu V. Zirsanga, CEM chuan hnathawktute inpekna leh an thawhrimna chu fakin lawmthu a sawia, theihtawp chhuah chhunzawm zel tura fuihin; an harsatnate pawh ngaihtuah sak a, a theih chin chinah,chinfel sak zel an ni ang tih a sawi a.Lawngtlai khawpui chhunga veng hrang hrang VC leh Association hruaitu te nen thawhhona tha tak an neih thin a vangin lawmthu sawi bawk a ni.
Post a Comment