Kan rama pawl lian ber Young Lai Association chu tun January thla hian kan inthlang leh dawn a, he thu ziah lai hian Branch engemawzat chuan inthlanna an nei tawh bawk.



YLA chu tlawmngai pawl a ni a, politic tuinuin a pawlh dal tur a ni lova, inthlannaah pawh pawl thianghlim a nih angin takin inthlan pawh thianghlim leh fair takin kan kalpui tur a ni.

YLA hruaitu nih hi sum hmuhna a ni lova, khawtlangah langsar tak leh intithunei taka min awm tirtu tur a ni hek lo. Tlawmngai pawl a nih angin a hruaitu tur pawh mi tlawmngai an nih a ngai a, inveivung leh thuneihna lekkawh nuam ti mi, thinram leh kut zang tan hruaitu nihna chi pawh a ni lo. Chanhai, chhuanchham leh tanpui ngaite zawng chhuaka, a theihna ang anga khaichhuaktu pawl a nih angin hruaitute pawhin chutiang rilru chu an put a ngai a ni.

Branch inthlanah hruaitu nih duh avanga pawl pawl awmte, line-up awm te hi YLA nihna nen a inmil lo em em a, hetiang awm tur lak atang hian hruaitu nilaite hi kan fekfawn hle a ngai bawk. Pawl inthlan dawn apianga lineup emaw pawl hran lo siam hman ziahte hi chu pawlah chuan mi hnawksak an ni tawh a, hruaitu pawh nise pawl tichak lo tu an ni ziah.

Thianghlim leh fel takin Branch YLA hruaitute i thlang theuh ang u. Chu chu YLA member-te duty pakhat a ni. 

Post a Comment

Powered by Blogger.