Sesawm. January 24, 2022 : January 20, 2022 (Ningani) khan Lunglei District chhung, Lunglei atanga KM 55-a hla Sesawmah ram vak pakhat chuan an khaw pa pakhat a kap palh a, an insai palhna hmunah hian a boral.
Vanduaina tawktu hi United Pentecostal Church (NEI) a an kohhran upa min Upa PC Zoliana a ni a, kum 69 mi hi a boral tuk January 21 chhun dar 12:00 khan Pastor R. Lalengzauva’n a vui liam a ni.
Vanduaina thlenna hmun hi Sesawm atanga KM khat leh a chanve vel leka hla Sesih ram niin vanduaina thlen hun hi chiang deuha hriat theih ni lo mahse thil thlen dan atanga chhutin tlai lam dar 04:00 bawr vel a nih a rinawm.
Pu Zoliana taksaah hian silai mu luhna a awm nual a, a kap palhtu hian SG a hmang niin a lang. A kah palh hnu lawk hian khuaah a kaptu hi a zualko nghal a, a inthiam lo hrehawm tilutuk chuan engmah a sawi chhunzawm hleih theih tak loh avangin vanduaina thlenna hmun hi an pan lawk thei lova. Thim hlima ruang awmna hmun an thlen hian Pu Zoliana hi a lo thi fel tawh nain a taksa hi a lo la lum a ni.
A sai palhtu hian harsatna tawk zuiin biak hleih theih lohva ala awm avangin engtia inkap palh nge an nih a, Pu Zoliana hian thil sawi a nei em tih pawh hriat theih a la ni lo.
Pu Zoliana hi Mizo paah chuan palian ve tak, feet 5 leh inchi 10 a sang niin a kaptu hian a chawi zawh mai loh avangin bawihsawmtu nei lovin khuaah a zualkosan a ngai a. Tleirawl sual pawh nei lo, naupan tet atanga kohhran bel tlat mi. Local leh Bial huap pawha hruaitu dinhmun pawimawh hrang hrang lo chelh thintu a ni.
Vanduaina tawktu Pu Zoliana te chhung hian a kap palhtu hi Pathian hmingin an ngaidam a, chuvangin a hming pawh tarlang lo turin mi an ngen a ni.
Post a Comment