South Lungpher, January 28, 2022 : Vawiin January 28, 2022 thleng khan S. Lungpher hmunah Myanmar ram buai avanga inhumhimna zawnga raltlan lo lut mi 200 dawn an awm tawh a, mi 100 bawr hi nikum 2021 September thla atanga awm tawh te niin a tlangpuiin Thlantlang lam leh Matu District atang tea lo lut an ni. Khawtlangin awmna tura an buatsaih sak piah lamah hian mahnia In luah leh chhungte bela awm engemawzat an awm bawk.
Heng raltlan lo lut te hi naupang leh hmeichhia an tam ber a, an awmna turin Tourist Lodged sak mek chu ruahman niin, helai hmun hian a len tawh loh avangin Nizan, Janaury 27, 2022 (Thursday) zana lo lut te hi YLA Hall-ah dah lailawk niin heng ho awmna tur hian vawiin January 28, 2022 (Friday) khan an awm lailawkna tur hi VC leh YLA te hmalaknain hnatlang koha sak nghal a ni a, hnatlang thawk hi hmun hnihah inthenin mi100 chuang an thawk chhuak leh bawk. Heng raltlante pual hian khawtlang huapin hnatlang vawi engemawzat thawh tawh a ni a, vehbur pawh lo thleng thar awm dan a zirin khawn sak thin an ni.
S. Lungpher mipuite dinhmun hi hriain Lawngtlai DC, Dr. Andrew H. Vanlaldika chuan tui dahkhawlna Sintex lei nan ₹.14000 pein Silpouline Piece 20 a pe bawk a, a tul ang zela mamawh dangte pawh buaipui zel an nih tur thu amah lo dawngsawngtu khawtlang hruaitute hnenah hian a hrilh a ni. DC in tranpuina a pek hma hian District Council, Bialtu MLA leh mi hrang hrang te hnen atanga tanpuina an dawn thin tawh thu leh heng hi an chhawr trangkai hle thu khawtlang hruaitute hian an sawi bawk.
Khawtlang hruaitute chuan khua a thal chhoh tawh dawn avangin tui dahkhawlna tur tam zawk an mamawh thu te, tuah thing, ei leh in leh thil dangah harsatna thleng thei thlirin tanpuina heng raltlante tana pe thei an awm chuan lawm taka an dawnsawn theih reng thu an sawi bawk.
Tin, raltlan lo lut te hi Medical Department nena trangkawpin Covid-19 hri an kai leh kai loh test tir thin an ni a, a awm hlui te hi chu Vaccine pawh pek vek tawh ni in, tuna lo lut mek te pawh a hma lama Test neih tir tur an nih thu YLA President Pu C. Duhlala chuan a sawi.
Post a Comment