Rajya Sabha MP Pu K. Vanlalvena'n SAGY Model Village atana a puan Pangkhuaah bul tanna hun hman a ni

 Lawngtlai 29.January,2022 (Inrinni) :  Nimin khan Pangkhua Community Hall-ah Sansad Adarsh Gram Yojana (SAGY) Model Village atana Member of Parliament (Rajya Sabha) Pu K. Vanlalvena'n a thlan, Pangkhua chu Lawngtlai Bawrhsap Dr Andrew H. Vanlaldika'n bul tanna hun a hmanpui.

Khuallian Dr Andrew H. Vanlaldika chuan model village bul tanpuia hawngin, Pangkhaw mipuite chu model village-a thlan a nih ang taka hna thawh a nih theih nan rilrua lo inbuatsaih tur leh khaw dangte tana entawn tlak nih tum turin a chah a, khawtlang hmasawn nana inlungrualna leh rinawmna vawng nung tlat turin a fuih a ni.

He SAGY model village bul tanna hun hi Lawngtlai DRDA Project Director Pi Marilyn Rualzakhumthangi, SAGY Charge Officer ni bawk chuan a kaihruai a. Khual zahawm, Lai Autonomous District Council (LADC)-a Art & Culture, etc. changtu Executive Member Pu BN Thangpuia leh Pangkhua VCP Pu H. Lalpiangthara te hnen atangin thu sawi ngaihthlak a ni a. Lai Cultural Club te'n Solakia lam hmuhnawm tak an entir bawk.

Chawhnu lamah Lawngtlai District-a sawrkar department hrang hrang atanga mi thiamte leh Sangau BDO hovin khawtlang hruaitute puala SAGY Model Village chungchang zir hona 'orientation programme' hman chhunzawm a ni a. He orientation programme-ah hian SAGY Model Village thil tum te, a ngaih pawimawh bik thil te leh tihhlawhtlin a tum te, Model Village te'n an kalpui theih hma lakna hrang hrang te, a hmanrua leh a kalpui dante bakah Village Development Plan chungchangte uluk takin zirtir an ni a. Hei bakah hian Line Department ai awh kal khawmte leh Pangkhaw mipuite, VC leh tlawmngai pawl te nen Pangkhaw tana hamthatna tur sawi hona (interaction) hun hman  a ni bawk.

Pangkhua hi Rajya Sabha MP Pu K. Vanlalvena'n SAGY Model Village atana a thlan niin, a tirah Phase-IV-a awm a ni a. Kumin hian Phase-VIII-ah dah a ni leh ta zawk a ni.