Rauthla Editorial, January 28, 2022 : Kan ram thenawm Myanmar buai avangin kan khawpui chhungah raltlan an pung zel a. Heng mite lo chhawmdawl kawngah mipuite hian theihtawp kan chhuah mek zel a. Kan sorkar pawhin a theihtawp chhuahin hma pawh a la ve bawk a. Tuna an ram buai hian ziaawm lam a pan thei lo anih phei chuan, tuna awm let eng emaw zat chu an lo la kal leh ngei dawn niin a lang. Chuvangin, tualchhung mite hian lo enkawl dan kan thiam a tul hle a ni.



Sorkar in duh ang leh beisei angin a ngaihven thei lova. An harsatna tanpui kawngah pawh tualchhung mite kan inseng nasa hle tawh a. Tun ang reng a chawmhlawm tur ringawta an inngai anih chuan tualchhung mite tan phurrit an ni thuai dawn niin a lang a. Chuvangin, heng mite hnenah hian mahni pawh a inhlawh a, an phak ang tawk leh an thawh theih ang tawk an zawn theihna tura kan fuih thiam pawh a tul hle tawh a ni.

Heng kan unaute harsatna leh mangannate hria a, lo chhawmdawl kawngah theihtawp chhuah tur kan nih mek lai hian an kut ke a din dan kawng an ngaihtuah si loh chuan, hun a kal zel ang a, kan tan hnawksak pawh an nih theihna lai tam tak a awm thei ang. Chuvangin, an mahni lo buaipui tu leh sorkar te pawhin hetiang kawnga hma an lak theihna tura kan fuih mawlh mawlh hi a ngai tak zet a ni. Tin, heng mite hi an khawsak nungphung pawh hi kan ngaihven a, kan zir chian reng pawh a ngai a. Anih loh chuan heng an harsatna te hi remchang ah la in, ruihhlo tawlh rukna leh ruihhlo hmanga sumdawnna kawng zau tak kan hawn palh ang tih hi a hlauhawm hle a. Hemi kawngah hian tualchhung mite kan tanrual pawh a ngai hle awm e. 

Post a Comment

Powered by Blogger.