Lawngtlai, January 29, 2022 : Vawiin, January 29, 2022 khan YLA Lawngtlai Vengpui Branch tena kum 2021 June thlà aṭanga an sak ṭan, YLA RÛN chu Pu C. Ngunlianchunga, Lawngtlai West Bialtu MLA chuan a hawng.
Lawngtlai Vengpui YLA Rûn hawnnaah hi an Branch Vice President T. Lalrampuia'n kaihruaiin Adviser Upa H. Thanghuta'n hunserh a hmang a. Khuallian Pu C. Ngunlianchunga bakah Central YLA President Pu HC. Vanlalruatpuia te, Branch YLA President Pu V. Lalengvara leh Lawngtlai Vengpui VCP Pu B. Lalṭhahlua te'n thu sawiin Branch YLA Secretary Pu H. Lalsawmkima'n YLA Rûn sak report a pe bawk.
Vawiina hawn tak Lawngtlai Vengpui YLA Rûn hi ₹.2,630,787 senga sak a ni a, Ground floor nen Floor thum niin Ground floor hi Library atana ruahman a ni a. Floor hnihna hi Office niin a chung ber hi Meeting Room a ni. YLA Rûn hi June 14, 2021 aṭanga sak ṭan niin kum chanve chhunga Sawrkar aṭanga ṭanpuina sum tel lova sak zawh a ni a. Lawngtlai Vengpui YLA Rûn hi an YLA Lawngtlai Vengpui Branch ten Branch YLA sum bakah vengchhung leh pawna mi tlawmngai thilpek bakah Lawngtlai West MLA Pu C. Ngunlianchunga'n ₹.1,00,000 a pek hmanga sak zawh a ni.
YLA Rûn hawn programme-ah hian Khuallian leh a ṭawiawmtute bakah Central YLA hruaitute, MJA Lawngtlai District hruaitute, Lawngtlai Vengpui VC member te, vengchhunga tlawmngai pawl hrang hrang hruaitute, vengchhung Kohhran hruaitute bakah Branch YLA leh a hnuaia Sub-Committee hrang hrang hruaitute an tel a ni.
Post a Comment