Lawngtlai, Janaury 30, 2022 : January 28, 2022 (Zirtawpni) khan Lawngtlai Press Club-ah Mizoram Journalists' Association (MJA), Lawngtlai District chuan Annual Conference an hmang a. Lawngtlai West Bialtu MLA Pu C. Ngunlianchunga chu khuallian niin, MJA General Headquarters President Pu Zonunsanga Khiangte chu khual zahawm a ni.
Chawhma lamah rorel leh hruaitu thlanna hun hman a ni a. Chawhnu hun hi District MJA Vice President Pu Elvis Lalthangzuala kaihhruaiah khuallian Pu C. Ngunlianchunga chuan District MJA te duhsakna thu leh fuihna thu sawiin, Lawngtlai District MJA member-te chu sawrkar khalh ngilna kawnga sulsutu leh mipui hnena thu dik kawhhmuhtu nih tum zel turin a chah a. District MJA Pension Fund-a hman atan Rs 20,000/- (cheng sing hnih) a hlan nghal bawk.
Chawhnu hunah hian The Salvation Army Lawngtlai bial Commanding Officer Capt. George Lalramnghaka'n hunserh hmangin, khual zahawm, MJA General Headquarters President Pu Zonunsanga Khiangte leh District MJA President Pu Lalngheta Ralte te hnen atangin thu sawi ngaihthlak a ni a. District MJA General Secretary Pu Lalchharliana hnen atangin kum 2021-22 (kum khat) chhunga District MJA te chetna leh hma lakna report ngaihthlak a nih bakah, District MJA Patron, Lawngtlai Bawrhsap Dr Andrew H. Vanlaldika leh Lai Autonomous District Council-a I&PR changtu Executive Member Pu Lalropuia Chinzah te'n District MJA annual conference chibai bukna lehkha an thawn chu chhiar chhuah a ni bawk.
Kum 2022-2024 chhung atana MJA Lawngtlai District hruaitu tura thlante chu he'ngte hi an ni:
President: Pu Lalngheta Ralte, Editor, The Lawngtlai Post
Vice President: Pu Elvis Lalthangzuala, Editor, Rauthla
Treasurer: Pu H. Lalrinmawia, Editor, Rameng
MJA annual conference hi LADC-a MDC Pu C. Lalmuanthanga, LADC-a IPRO Pu HC Vanlalruatpuia, MJA General Headquarters Treasurer Pu C. Lalhmachhuana leh Finance Secretary Pu Joseph Lalnuntluanga te bakah, sawrkar official thenkhat leh Lai DCC hruaitu thenkhatte'n an hmanpui bawk a ni.
Post a Comment