Rauthla Editorial, January 31, 2022 : Lawngtlai district chhung inkalpawhna kawngpui hrang hrang, tuna thawmthat hna thawh mekte chu thuneitute leh NGO te pawhin an en tawh thin a. A hmunah te kalchilh niin an hnathawh dan tur thleng pawhin kawhhmuh an ni fo thin. Kawngpui tha kan nei dawn emaw kan tih laiin, hmasawnna tak tak hmuh tur a awm lo fo thin. Chuvangin, sorkar leh NGO te hi kan tan ho a, heng hnathawktute hna thawh dan hi ennawn fo a ngai dawn ni in a lang.
Kan hria a, kan ram kawngpuite hi siamthat ni ve thin bawk mahse fur khat daih hi a awm mang lo niin a lang a, thal hunlaia tha tak emaw kan tihte kha fur khat a tawrh meuh chuan lirthei chu sawi loh, mihring tan pawha zawh harsa khawp a lo ni leh mai thin. Kawngpui kan nei tha lo hi kan hmasawn theihlohna bul ber a ni a, hei vang hian sorkar, mipui leh a siamtu contractor te hian rilru tak tak senga kan ngaihtuah a tul hle. Tlangrama cheng kan ni a, rel te, thlawhna te leh lawng ten engtikah mah a thlen lohna tur hi a ni deuh vek zawk a, hei vang hian kawng hi kan chaw bel nen sawi hran theihloh khawpa pawimawh a ni.
Tin, mipuite pawhin kawngpui pawimawhna te hi hre thar zel ila, kan fimkhur loh avanga kawng chhiat theihna hrang hrang heng kawngsira leivung paih mai te, kawngpuia rod chhut ngil te leh kawngpuia motor sil te hi kan tih loh tawp tur a ni. Feet 10 lek pawh nise kawng siam tura a man tam zia hi hria ila, kan kawng neih chhunte hi i duat zual sauh sauh teh ang u.
Post a Comment