Rauthla, December 14, 2021 : Chief Minister Pu Zoramthangin nimin khan CM Conference Hall-ah Myanmar rama mipui thlan hruaitu, Mizorama awm mekte a kawm a. Raltlante tan Mizoramin theihtawp a chhuah zel tur thu a hrilh.



Chief Minister chuan Myanmar rambuai avanga mipuiten harsatna namen lo an tawk chu pawi a tih thu sawiin, mahni sahimna zawnga ram danga kal zingah a then India rama rawn lut te chu Mizoram chuan chhawmdawl turin theihtawp a chhuah zel a ni a ti a. India sawrkar hotute bulah pawh raltlante chhawmdawl chungchang  hi vawi tam sawipui tawhin, tun hnaia Prime Minister leh Home Minister a hmuh tum pawhin tuamhlawm an mamawh zia a sawipui thu te, Myanmar rama mipui sawrkar ngelnghet tak din tura an entawn tur tha ber chu India ram a nih thu te, India ramin Myanmar chu a ensan theihloh thu a hrilh thute sawiin, anni pawhin an ngaihven thu a sawi.

Pu Zoramthanga chuan hun rei vaklo ah democracy chu Myanmar ah tundin a nih leh ngei a rin thu leh theitawpin huaisen takin an tan a beih zel tur thu a hrilh a. Inunauna nghet leh tha taka a awm theih nan Mizoram mipui leh Myanmar unaute chu theih tawp chhuah tlang zui zel turin a sawm bawk.

Myanmar MP te chuan Mizoramin tha taka an lo dawnsawn a, mipuiin an lo tuamhlawm avangin lawmthu an sawi a. Sawrkar, tlawmngai pawl, zirlai pawl, kohhran leh mipuii an tana hma an lakna zawng zawng chu ropui tiin raltlan ang nilo, inpui a lo lut ang mai an nih thu te an sawi a ni. Harsatna hrang hrang an tawhte leh thu pawimawh dang Chief Minister hnenah an thlen bawk a ni.

Meeting-ah hian Mizoram State Planning Board Vice-chairman Pu H. Rammawi leh OSD to CM Pu Rosangzuala te an tel bawk.

 

Post a Comment

Powered by Blogger.