Aizawl, December 17, 2021 : Nimin khan YMA inkhawmpui lianah Central YMA President atan Pu R. Lalngheta, Hlimen chu hneh taka thlantlin a ni.



Nimina Aizawl Salem Veng R. Dengthuama Hall-a YMA inkhawmpui vawi 73-naah hian kum 2 chhung atana hruaitu tur an thlang a. President atan thlan tlin Pu R. Lalngheta hian vote tla zawng zawng 1730 atangin vote 1007 a hmu a, Vice President a thlantlin Tv. Lalhmachhuana chuan vote tla 1705 atangin vote 794 a hmu. General Secretary thlanna a vote tla 1615 atangin, Prof. Lalnuntlunga chuan vote 1049 hmuin thlan tlin a ni a. Asst. Secretary atan Prof. Malsawmliana chuan vote tla 1,537 atanga vote 659 hmuin a tling bawk. Pu Fabian Lalfakawma chuan vote tla 1365 atangin vote 554 hmuin Treasurer ah thlan tlin a ni a. Finance Secretary atana thlan tlin Pu Ronihthanga chuan vote tla zawng zawng 1,615-ah vote 448 a hmu a ni.“

YMA inkhawmpui-ah hian Kum 2023 a YMA Gen Conference Vawi 74-na thlengtu tur Manipur Group YMA chu ruat a ni a. Inkhawmpui hi Churachanpur-ah neih a ni ang.

Nimina an thurel langsar zingah hian Zirtirtu mahni post-a awm tha duhlo te an post-a an awm theih nan hmalak nise an ti a, Zirna School-ah Mizo hnam lam zirtir a nih theih sorkarah thlen nise tihte, kan ramchhung thei, phun uar turin sorkar nena tangduna hmalak nise tih a ni a, Mizoram ramri chu sorkarin a rang lama chinfel dan ngaihtuah rawh se tihte a ni. Kum 2021-2023 kumpuan atan ‘Ram leh hnam humhalh’ tih chu thlan a ni.  

Post a Comment

Powered by Blogger.