Rauthla, December 15, 2021 : Vawiin khan Argentina leh Barcelona striker kum 33 mi, Sergio Aguero chuan Nou Camp-ah football a chawlhsan thu a puang.



Manchester City striker hlui May 31, 2021 khan kum 10 zet a lo khelh tawhna Manchester City chhuahsanin Barcelona chu a thlawnin a zawm a. Barcelona tan hian vawi 5 chiah inlan hmanin goal 1 a khung bawk. Barcelona hian November thla khan Alaves an tum a, 1-1 a an inhnehtawk tum hian Sergio Aguero hian lung lamah harsatna a nei a, field atanga lak chhuah niin, thla 3 chhung inkhel thei lo tura ngaih a ni. A dinhmun tha mai tura ngaih a nih laiin November thla tawp khan Barcelona boss Xavi chuan an striker Sergio Aguero dinhmun chu a hriat chian loh thu a sawi a, football a la khelh theih chu a ring hle. Mahse, December thla tir thleng khan a dinhmun a that theih loh avangin mi tam takin football a chawlhsan mai an ring a, hei hi vawiinniah a tichiang ta a ni.

Sergio Aguero chuan, vawiin a thutlukna siam chhan chu a hriselna kaihhnawih vang a nih thu a sawi a. Thla khat leh a chanve dawn a taksaah harsatna a neih thu sawiin, medical staff-te enkawlna hnuaiah dinhmun harsaah a din loh thu erawh a sawi bawk. Aguero chuan a thutlukna hi football khelh leh theih in beisei tho chung siin ni 10 liamta khan a siam tih a sawi a. A football zingkawng zawhah a inchhuan thu a sawi a, hei hi kum 5 mi a nih laia a suangtuah a nih thu a sawi bawk. Aguero chuan Atletico Madrid leh Manchester City chungah lawmthu a sawi bawk.

Argentine striker Sergio Aguero hian a career hi chu kum 9 a nihin an ram club Independiente atangin a tan a, He club tan hian vawi 18 inlanin, goal 38 a khung a. May 2006 khan Spain club lian Atletico Madrid a zawm a, Atletico Madrid tan hian vawi 230 khelin, goal 100 a khung. He club-a a khelh lai hian kum 2010 khan Europa League title a la a, hemi kum vek hian UEFA Super Cup title a chawi bawk. July 2011 ah Premier League club Manchester City chu kum 5 chhung atan a zawm a, he club tan hian kum 10 khelin, goal 390 a khung bawk a ni. Manchester City tan hian Premier League Title vawi 5 a chawi a, FA Cup vawi khat chawiin, League Cup vawi 6 a chawi bawk a, FA Community Shield vawi 3 a chawi bawk. Kum 18 a nihin Argentina senior team tan a inlan a, a ram tan hian vawi 101 fehchhuakin, goal 41 a khung bawk. Ram tan Copa America Title 2021 chawiin, kum 2014 ah a ram chu FIFA World Cup final a luh pui bawk.

Sergio Aguero hian football a khelh chhungin mimal chawimawina thahnem tak a dawng a. Chungte chu :

FIFA U-10 World Cup Golden Shoe 2007

FIFA U-10 World Cup Golden Ball 2007

Golden Boy 2007

World Soccer Young Player of the Year 2009

Premier League Golden Boot 2015

La Liga Ibero-American Player of the Year 2008

Don Balon Award 2008

FSF Player of the Year 2014

Manchester City Player of the Year - 2

Premier League Player of the Month - 7


Post a Comment

Powered by Blogger.