Lawngtlai, December 16, 2021 : Nehru Yuva Kendra (NYK) Lawngtlai District huaihawtin nimin khan Lawngtlai DC Conference Hall-ah thupui thlan sa hmanga thu insawisiakna 'District Level Declamation Contest on Patriotism & Nation Building' buatsaih a ni.



He huna Khuallian, Lawngtlai Sub-Divisional Officer (Sadar) Pi TT Beikhaizi chuan thalaite hmasawn nana NYK hma lakna fakin, thalaite chu ram siamna kawnga hlawk taka tha thawh theitu an ni, a ti.

Thupui insawisiaknaah hian Lawngtlai District chhunga Block pali atangin Block ai awh mi pahnih theuh telin, "Patriotism & Nation Building - Together We Grow, Together We Prosper, Together We Try, Together We Build a Strong and Inclusive India" tih thupui hmangin sap tawngin thu an insawisiak a ni.

Lawngtlai District Level Declamation Contest, 2021-ah hian Lalrempuia, Electric Veng, Lawngtlai Block chu pakhatna niin, Rs 5,000/- leh citation a dawng a. Vanlalchhuanga, Hmunnuam, Bungtlang 'S' Block chu pahnihna niin, Rs 2,000/- leh citation a dawng a. C. Lallawmzuali, AOC Veng, Lawngtlai Block chu pathumna niin, Rs 1,000/- leh citation a dawng bawk.

Lawngtlai District chhunga thalaite tana thupui insawisiakna hi kum 2022 Republic Day lo thleng tur puala buatsaih a ni a. He district level contest-a pakhatna hian state level-ah District ai a awh dawn a. State level-a pakhatna chuan national level-ah state ai a awh ve leh dawn a ni.

He hunah hian NYK buatsaih Clean India - Cleanliness Competition-a Lawngtlai khawpui chhunga veng faia thlante hnenah lawmman hlan nghal a ni a. He cleanliness competition-ah hian pakhatna Council Veng, pahnihna New Vengpui leh pathumna Lawngtlai-III te an ni. 

Post a Comment

Powered by Blogger.