Lawngtlai, November 30, 2021 : Vawiin November 30, 2021 khan Lawngtlai District Football Association (LDFA) buatsaih Junior leh Sub-Junior Football Tournament final chu CYLA Playground, Lawngtlaiah khelh a ni a. Inkhelh hmaa inkhawmna tawi buatsaihah khuallian Pu VL. Hmuaka, Chairman, Lai Autonomous District Council chuan, Football chu infiam mite zingah hlut hlawh ber tih theih tur khawpin khawvel pawhin a ngaihhlut avangin football player te pawhin chu a hlutna chu pho chhuak thei tura tan kan lak a ngai a ni, a ti. Pu VL. Hmuaka chuan, media hrang hrang kal tlangin infiamna chi hrang hrang kan hmu a. Chung zingah chuan football hi khawvelin a ngaih hlut ber leh a dahsan ber a ni a. Football hi eizawnna leh hausakna atan pawh an hmang hial tawh a ni. Chutiang dinhmuna ding ve tur chuan insumtheihna leh taimakna kan neih a ngai tak zet a. Tuna thalai rualte hian chumi ti ve thei tur chuan chakna in neih a ngai a, teirei peih pawh a ngai tak zet a ni, a ti bawk.  

Khuallian chuan, tunah hian Mizoram Chief Minister Pu Zoramthanga leh Pu Robert Romawia Royte, Sports Minister te hmalakna avangin Mizoram thalaite tan Sports lamah nasa takin hma kan sawn nasa hle a. Mizoram hmun tam takah Artificial Turf phah ani tawh a. Kan District-ah pawh state sorkar hmalaknain Lawngtlai College Veng field ah Sport Training Centre leh Artificial Turf phah turin  hna an thawk mek zel a. Tin, District playground, Lawngtlai Vengpuiah pawh Artificial Turf phah turin lung pawh phun a ni tawh bawk a ni. Tun sorkar hian thalaite hmakhua ngai takin infiamna kawngah hma kan sawn theihna tura hna min thawhsak hi hre reng ila, keini thalai rualte hian a hlawkna pe chhuah ngei kan tum tur a ni, a ti a. LADC CEM Football tournament pawh a awm theihna turin ruahmanna pawh peihfel a nih tawh thu a sawi lang bawk a ni.

'Tuna Age group Under 17 leh Under 14 player te hi kan Lairam leh Hnam tihmingthatu leh timawitu turte in ni a. Lawngtlai District mai ni lovin State leh National Level thleng pawha hming lang thei tura beisei in ni a, chumi tur chuan insumtheihna, taimakna leh thawhrimna neia theihtawp in chhuah a ngai a ni' tiin Pu VL. Hmuaka chuan player -te a fuih bawk a ni. 




Under-14 final-ah Lawngtlai football-a rorel thin tu Council Veng an tho leh

Vawiin November 30, 2021 khan Lawngtlai DFA buatsaih Junior & Sub-Junior Football Tournament final chu CYLA Playground, Lawngtlaiah khelh a ni a, final-ah hian Council Veng U-14 chuan Lawngtlai-III (Blue) U-14 chu 3-1 hnehin an champion.

Inkhelh ṭan aṭangin pumrua te zawk Council Vengin an nawr nghal a, 16mins a ral tihah Council Veng jersey no. 6 in an midfield neih ṭhat hmang ṭangkaiin goal chance a nei nghal. Hemi hnu hian 18mins ah Council Veng jersey no. 3 chuan mar takin L-III goal lamah a shot a, L-III keeper tan harsatna a awm lo.

19mins-ah goal a lut a, Council Vengin corner an hmu a, corner aṭanga ball lo kal hi Council Veng jersey no. 10 chuan mawi takin a head goal. Hun a kal rei lo, tun tournament-a striker che ṭha tak Council Veng jersey no. 37 chuan box chhung hret aṭangin 23mins-ah cool takin a pet goal. First half chhungin L-III lamin goal zawnah shot mumal tak an nei lova, 2-0 in first half an tin.

Chawlhlawk hman zawh a ni a, tan aṭanga 2mins-ah Council Veng jersey no. 18 in chance a nei a, post pawnah a chhuak. 31mins-ah Lawngtlai-III jersey no. 11 in free kick aṭangin a pet goal tep bawk. 36mins-ah Council Veng jersey no. 10 in nalh lutukin goal-ah a shot a, goal pawnah a chhuak hlauh. 39mins-ah Lawngtlai-III lamin goal an thun a, box pawn atanga free kick an hmuh chu jersey no. 17 in mawi lutukin Council Veng keeper man phak lohin a pet lut. 43mins ah Council Vengin a goal thumna an khung a, mual dinglam sir atanga ball cross chu jersey no. 9 in kil lutukin Lawngtlai-III goal-ah a thun a, hun pek belhah Council Veng lam hian chance vawikhat an nei leh bawk. Goal a luh belh tawh lova, Council Veng hian 3-1 a Lawngtlai-III hnehin Under-14 champion an ni ta a ni.

Under-14 bikah hian Chandmary jersey no 11 Zothanmawia (goal 6) chu Top Scorer a ni a, Council Veng jersey no. 37 Lalramdika chu Best Player atan thlan a ni a, Council veng goalkeeper Malsawmropuia chu Best Goalkeeper atan thlan a ni. R. Vanhne in Far Play Award an dawng bawk a. Under-14 ah hian team 18 an tel a ni.

Under-17 ah Three Pui an champion

Under-17 final-ah Lawngtlai-III leh Bungtlang South te an inkhel a, Lawngtlai-III lam hi fans ngah an ni a, mual sirah an thawm a tha hle. Hetih lai hian Bungtlang South lam pawh a khawnawtin an lo kal emaw tih mai turin fans an thahnem hle.

Inkhelh hun pangngaiah goal a luh loh avangin, penalty hmangin a chak zawk zawn a ni a, Lawngtlai-III hian 4-3 in Bungtlang South hi an hneh a, Under-17 champion an ni ta a ni.

Under-17 ah ian Best Player ah Lawngtlai-III jersey no. 8 T. Lalmuanawma thlan a ni a, Best Goalkeeper-ah Bungtlang South keeper Lalramhmingmawia thlan a ni a, goal 4 thun thu Lawngtlai-III jersey no. 9 Obeda Lalhunropuia chu Top Scorer a ni bawk a. Diltlang hnenah Fair Play Award hlan a ni a. Under-17 ah hian team 17 an tel.

Post a Comment

Powered by Blogger.