Rauthla, November 30, 2021 : Nizan zanlai dar 1 khan Paris-a Theatre du Chatelet ah he planet-a football lama mimal chawimawina sang ber Ballon d'Or award semna neih a ni a, Argentine superstar Lionel Messi chuan a vawi sarih nan Ballon d'Or a dawng.
Kum 34 mi PSG forward Lionel Messi hian kum 2021 khan club leh ram tan goal 40 a khung a, a ram chu Copa America title a lakpui a, a club hlui Barcelona chu Copa del Rey title a lakpui bawk.
Kumin Ballon d'Or thlannaah hian ram hrang hranga journalist 180 in vote an thlak a, kum 2020 khan Covid-19 hri leng avangin he ward hi sem a ni lo. Kum 2008 atanga 2019 thleng khan Lionel Messi leh Cristiano Ronaldo te chuan Ballon d'Or hi an in dawn chhawk thin a, kum 20218 khan Croatian midfielder Luka Modric chuan Ballon d'Or hi a dawng hlauh bawk. Lionel Messi hian Ballon d'Or vawi sarih (2009, 2010, 2011, 2012, 2015, 2019, 2021) a dawng ta a ni.
Argentine captain Lionel Meesi chuan, kum hnih kaltaa he award ka dawn khan a tawpna turah ka ngai a, hei mai bakah mi tam takin engtikahnge football ka chawlhsan dawn tih min zawt thin. Mahse, tunah Paris-ah ka awm mek a, ka hlim hle a ni a ti. Messi chuan a khingpui Poland captain Robert Lewandowski chu a fak hle a, a chunga a awm thei chu chawimawina ropui tak a nih thu a sawi a, nikum khan he award hi sem ni ta se, Robert Lewandowski hian dawn a phu ber tih a sawi lang bawk.
Ballon d'Or pahnihna Robert Lewandowski hian kum 2021 khan inelna hrang hrangah Bayern Munich tan goal 53 a thun a, Striker of the Year lawmman a dawng.
Pathumnaah Chelsea leh Italy midfielder Jorginho awmin, Jorginho hian a ram chu Euro 2020 ah a champion pui a, a club chu champions league title a lakpui bawk.
Ballon d'Or dawng thei tur hian khawvela player tha 30 thlanchhuah an ni a, Chelsea in player panga an thawh a, pathumna Jorginho, pangana N'Golo Kante, sawmpahnihna Romelu Lukaku, sawm pakuana Mason Mount leh sawmhnih leh pakuana Cesar Azpilicueta te an ni. Premier League champion Manchester City in player panga bawk an thawh a, pariatna Kevin de Bruyne, sawm pangana Raheem Sterling, sawmhnihna Riyad Mahrez, sawmhnih panga Phil Foden leh sawmhnih parukna Ruben Dias te an ni. Manchester United in player pahnih thawhin Ronaldo chu parukna a ni a, Bruno Fernandes chu sawmhnih pakhatna a ni bawk. Liverpool forward Mohamed Salah chu pasarihna a ni a, Tottenham striker Harry Kane chu sawmhnih pathumna a ni bawk.
Hmeichhe lam Ballon d’Or hi Spain leh Barcelona attacking midfielder Alexia Putellas chuan a dawng a, kum 27 mi hian kuminah goal 38 a khung tawh a, assist 27 a nei tawh bawk a ni.
Kum 21 chin hnuailam player tha ber hnena an pek thin Kopa Trophy chu Barcelona leh Spain midfielder kum 19 mi Pedri chuan a dawng a, goalkeeper tha ber hnena pek thin Yachine Trophy chu PSG leh Italy goalkeeper Gianluigi Donnarumma chuan a dawng bawk.
Kuminah hian award thar pahnih Club of the Year leh Striker of the Year lawmman sem a ni a, Club of the Year hi Chelsea-in an dawng a, Striker of the Year hi Bayern Munich leh Poland striker Lewandowski chuan a dawng bawk a ni.
Post a Comment