Lawngtlai 06.Sept,2021 :Trinamool Congress hruaitu senior Abhishek Banerjee, MP chuan dan kalh leh dan lova pawisa a dawng (illegal transactions) emaw chutiang-ah chuan a inhnamhnawih tih emaw central agency eng pawhin an hmu chhuak a nih chuan a inkhaihlum ang a ti.
Lungalhthei eirukna (coal scam) nia puh thubuaia Enforcement Directorate-in an kohna avanga Delhi a pan dawnin nimin khan Kolkata Airport-a chanchinbumite hnenah Banerjee chuan BJP chu West Bengal Assembly thlannaa an chak loh avanga politics-a inthungrulhna hmangah a puh a. Abhishek Banerjee chuan “Nikum November thlaa ka sawi kha ka’n sawi nawn leh ang e, central agency eng pawhin, pawisa 10 pawh dik loa ka hmuhna (illegal transaction) an finfiah a nih chuan CBI emaw ED emaw-in an chhui a tul lo vang, inawhhlumna dawhkanah ka chuang ang a, vantlang hmuh lai ngeiah ka inawkhlum ang” a ti.
West Bengal-a coal scam nia sawi chungchanga pawisa chingpen chungchangah zawhna zawh turin vawiina Investigating Officer hmaa New Delhi-a inlan tura Abhishek Banerjee chu koh a ni a. Chanchinbumite hnenah chuan “Eng investigation pawh hmachhawn turin ka inpeih” a ti.
Kolkata thubuai ni siin Delhi-ah koh a ni tih a sawi a. “Inthlannaa chak loh avang leh politicsa Trinamool Congress hneh loh avangin BJP chuan phuba lakna an zawng a. BJP chuan politics-a an interest tihpuitlin nan investigating agency-te hman bak hna dang an nei lo” a ti.
West Bengal Chief Minister Mamata Banerjee tupa Abhishek Banerjee chuan “BJP hruaitu tu paw kum nga kal ta chhungin central agency-ten engnge an tih tih leh Narendra Modi sawrkar kum sarih chhunga ram dinhmun sawipuiah ka sawm a ni” a ti.”A hun leh hmun sawi se ka kal ang a, ka pho mualpho thei lo a nih chuan politics hmunah ka ke ka nghat tawh ngai lo vang” a ti.
Post a Comment