Lawngtlai 08.09.2021: China chuan Taliban-in an sawrkar thar siam/lakluhnaa tel tura an sawmna chungchanga zawhna a chhang lo a, media ten an report dan chuan Taliban chuan an sawrkar thar lawmnaah tel turin China, Pakistan, Russia, Turkey, Iran leh Qatar te an sawm a ni.
Hetih lai hian China chuan englai pawha a thawhpui Pakistn leh Russia nen Afghanistan laka a policy tur a duang mek nia sawi ani a, Russia leh Pakistan chuan Afghanistan an ri (boder) a ni.
Beijing chuan Pakistan leh Russia nen Kabul-a an embassy chu an la hawng reng a, Taliban sawrkar thar siam hun a nghak a ni. Hetih lai United States, United Kingdom leh khawthlang ram dangte chuan Kabul-a Taliban sawrkar thar pawmpui chungchangah an hmanhmawh loh thu an sawi a ni. Sawrkar thar siamnaa kal tura Talibanin an sawmna chungchangah Chinese Foreign Ministry spokesman Wang Wenbin chuan “Hemi chungchangah tunah mai chuan thu thar ka nei lo” a ti a. Mahse, Afghanistan-in sawrkar huapzo, innghahna zau, ram chhung leh ram pawn lam tana policy tunlai leh fing a siam tur leh a thenawm ramte nen inbe tha taka a awm tur chu China chuan a thlawp dawn tih a sawi nawn.
China chuan Panjshir valley-a Taliban leh Ahmad Massoud-a hruai National Resistance Force-te inkahna chu hnai takin a thlir tih China Foreign Ministry thupuangtu chuan a sawi bawk. Panjshir valley dinhmun chuan Taliban-in Afghanistan sawrkar thar an siam tur chu a tikhawtlai nia sawi a ni.
Post a Comment