Covid hri thawh dan a tira an sawi ka hriat hmasak berah chuan, 'An mita en ringawt pawhin a kai theih a, an tlu tawp tawp mai a ni' an ti a, hri hlauhawm lutuk, deadly virus angah ka lo ngai a. Mahse, a lo ni chiah lo a nih hi, thihpui chu awm ve bawk mah se. Tin, Covid vanga thi kan tih tam tak chu natna benvawn nei sa an ni deuh zel a, thenkhat phei chu kai lo mah se, thi tho tura ngaih khawpa lo na sa tawhte an ni.
Hri kaite chu mi hlauhawm lutuk angin kan en a, Thenawm hnaiah kai an awm phei chuan kan hlau lutuk kan phi cheng a, a kaite tan pawh inthlahrunawm tur khawpin kan siam a, phar natna tenawm tak vei ang maiin kan en mek chu a nih hi. Kan hlauh êm avangin lock down kan phelh hleithei lo a, phelh thawl deuh hnu pawhin veng bil anga inkharkhip hram tumin sawrkarah ngenna kan la thehlut hram a, restricted area-ah veng tam tak chu puan an han ni zui leh a. Kan hlauh dan êm êm hi a nuihzatthlak lek lek tawh zawk a ni.
Hri kai report tar lan apiangin, 'vanduaithlak takin' tih chu bul tan nan kan hmang hram a, a kaite lah chu fuih a hnekin, 'A van pawi em!' tiin kan comment-sak a, Ambulance lahin ri thei zawng zawng ti riin chak mangkhengin a tlanpui bawk a, dam reng tan pawh rilru hnual rawihna khawp a tling. Covid hri kaite chu engmah insawiselna nei lem lo-a negative zui ta tam tak an awm a, a then erawh chu zan 2/1 te an khua a sik ve lâwp lâwp bawk a. Chutah chuan ina kan ei ang nachhawkna kha an ei mai a, an khuh leh ina kan ei ang khuh damdawi an ei leh mai a. Kar khat a liam chuan dam takin an chhuak ve leh mai Thin. La na deuh erawh an awm ve tho bawk a.
Positive mai ni lo, a first contact, second contact thlengin kan quarantine vek a. Positive te phei chu kan thinhrik titih a, dama an chhuah hnu-ah pawh 'ni chuti zat quarantine leh tur' kan la ti lehzel a, an taksa mai ni lo, an rilru thlengin kan sawp chhiatsak a ni. Engah nge thihpui ngei ngeina hri pawh ni lo hi heti êm êm a kan hlauh over turu buru uchuak le!? Nun phung pangngaiin nung i la, na zual deuh erawh inentirin damdawi inah te in dah luh mai ni ta se.. Hetiangte chuan kan mihring mihrinna thlengin a tidal zo vek dawn a nih hi.
'Inenkawlna a hautak si, retheite bawk hian kai i la, kan buai dawn lutuk' te kan ti a, natna neih em em loh phei chuan mahni inah inenkawl mai i la, cheng za tam senna tur a awm miah lo. 'Kan la tlem si a, kan pùl vek ang' te kan han ti leh hluai a, Covid hi pùl hukna hri ni se India ramah ngawt pawh vaibelchhe tel an thi tawh ang. Mahse, recovery rate chu za zelah 97%+ a ni. State dangah chuan nun phung pangngaiin an nung deuh vek tawh. Natna satliah angin an en a, an hlau over ve lo. Keini erawh chuan lock down la sawi mawi char char duh khawpin kan la hlau. Kan dawih vang piah lamah thil dang a awm tel mai thei bawk.
A sei lutuk dawn. Mi ei zawnna nghawng chhe vek khawpin kan hlauh vangin kan in-lock down tawh a, a tawk viau tawh a ni. Ka sawi tawh angin sawrkar leh sawrkarin a rà wn thin NGO te hian a tam zawkin hna an thawh theih dan kawng zawng tawh se a Tha khawp mai. Kan hlauh lutukna hian kan dinhmun nasa takin min phehsak tawh a, ding chhuak hlei thei lo tam tak kan awm dawn tlat. Kan chhiat vek hma hian ngaihtuahna thar seng mawlh teh se
Post a Comment