Lawngtlai 08.09.2021 :Kerala High Court chuan CoWin portal siamtha (reschedule) turin sawrkar laipui leh state sawrkar te a ti a, Covid-19 vaccine first dose la tawh, second dose lak hma duhte tan tuna first dose lak atanga ni 84 hnuah tih chu first dose lak atanga chawlhkar li hnuah tia siamtha turin a ti a ni.
Kerala High Court Judge, Justice P.B.Suresh chuan sawrkar laipui leh state sawrkarten ram pawna zin turte Covid-19 laka humhimna tha zawk leh hma zawk thlantir a phal chuan eng vangin nge an hna thawhna emaw, an zirnaah emaw, humhimna hma zawk an neih/duh chuan chung mite hnenah chuan duh thlanna chu pek ve an nih loh ang a ti. Chung mite chu ram pawn lama va awm hlen tur pawh an ni lo va, ram pawn lamah an va kal a, an hna/tih tur an thawh/ tih zawhah an lokir leh a ni mai si a ti. Kerala High Court chuan he thutlukna hi September ni 3-a a siam tawh kha a ni a, mahse, thawhtanniah khan mipui hmuh theih a ni chauh a ni.
Kerala High Court chuan sawrkar laipui policy-ah miin vaccine lak hmaah duhthlan theihna a nei a, vaccine lak thuai thuai a nih theih nan man chawia lak theihnate pawh private hospital-ahte siam a ni a. Bakah vaccine lak chu mimal duhthlanna, an duh leh duh loh athu a ni a, tumah tihluihna a awm lo va. Mahse, vaccine chu vawihnih lak tur a ni a, vaccine-in a ven that leh ven that loh chu vaccine lak inkara zir a ni a. Miin vaccine pawh lak duh loh theihna a neih laiin miin vaccine a lak a, chawlhkar li hnua vaccine vawihnihna lak a duh chuan sawrkarin phal loh sak bur theihna a neihna chhan tur a awm lo a ni a ti. Vaccine lakna man lah anmahni pek tur a la ni leh ta nghal a ti
Post a Comment