Lawngtlai 04.Sept,2021 :Mexican boxer Jeanette Zacarias Zapata chu Inrinni (28.08.2021) zanah khan boxing ring chhungah an knockout a, a harh chhuak leh tawh lo a, nimin khan a thi zui a ni.
Inrinni zanah (28.08.2021) khan Montreal khawpuia GVM Gala International- ah Jeanette Zacarias Zapata leh Marie Pier Houle te chuan profes- sional fight an nei a. Boxing ring chhungah an inhnek chho a, round 4-naah Marie Pier Houle chuan Jeanette Zacarias Zapata hi a knockout a, hei hi Mexican boxer hian a thihpui ta a ni Marie chuan Zapata chu a kil lamah a dang bet a, a hnek fuh nual a. Upper- cut fuh zeta a dawm hnuah right hook in a hnek leh a, Zapata mouth guard chu a tla chhuak nawlh nghe nghe a.
Mexican boxer chu a la ding hram a, dar a rawn rik hnuah a la pangngai hmel loh em avangin a trainer Jovanni Martinez chuan ring chhuatah chuan a muttir a, an corner lamah pawh a thleng phei thei lo a ni. Medical team te chu ring chhungah an lut vat a, Zapata chu an buaipui a. Rin aia a nat hmel avangin stretcher hmangin an zawn a, ambulance hmangin damdawi in lamah an kalpui a. Nikhaw hre loin a awm zui nghal a, nimin khan a tlin ta lo a ni.
Fight promoter Yvon Michel chuan, “Zirtawpni chawhnu dar 3:45 ah khan Jeanette Zacarias Zapata chuan min kalsan ta a ni tih an chhungte hnen atangin thu kan dawng a, pawi kan tiin, hrehawm kan ti tak zet a ni,” a ti. “Groupe Yvon Michel team pumpui chu he chanchin hian min thawng em em a, na kan ti a, pawi kan ti em em mai a. Jeanette Zacarias Zapata kalsan tak a chhungte kan tawrhpui tak zet a, a thiante bakah a bik takin a pasal Jovanni Martinez kan tawrhpui lehzual a. A pasal hian a hun tawp thlengin a khum bulah a awmpui a ni,” a ti bawk.
Kum 18 mi Zapata inhnekpui Marie Pier Houle pawhin social media lamah Jeanette Zacarias Zapata thi chu pawi a tih thu leh a tawrhpuina thu te chu a tar lang ve nghal vat a. A chanchin hriat chu mak a tih thu leh hrehawm a tih thu a tar lang a ni.
Houle chuan, “Infiammi tha em em mai Jeanette Zacarias Zapata chanchin duhawm lo tak kan hre mai hi a lungchhiatthlak a, hrehawm pawh ka ti em em a. A kalsan tak a chhungte leh a pasal Jovanni Martinez te ka tawrhpui tak zet a, an ni hi Pathianin a awmpui tlat ka duh a, Zapata hmun ruak kalsan hi a luah khah ngei pawh ka beisei,” a ti.
WBC pawhin Zapata thihna chungchangah hian thu chhuah an siam ve bawk a, “WBC President Mauricio Sulaiman leh WBC nena inzawm boxing chhungkua zawng zawngte chu he thihna hian a nghawng nasa em em a, kan tuar na tak zet a. Jeanette kalsan tak a chhungte leh thiante zawng zawng kan tawrhpui hle a, thlamuang takin chawl rawh se,” an ti.
Post a Comment