LAWNGTLAI 04.SEPT,2021 : Tunkar Nilaini khan Taliban te chuan anmahni duh lo Panjshir Valley tan hmun khawh tlat National Resistance Front (NRF) te chu an ralthuam te daha Taliban kuta inpe mai tura an tih chu, chuti maia inpek an tum lohzia tilangin he valley hneh chhuh tumtu Taliban fighter te nen hian an inkap nghal a ni. Panjshir valley hian tlang ram chhengchhe takin a hual vel a, helai luh theihna khà n hi tlem te chauh a awm avangin pawn lam atanga run hleih theih loh NRF pasaltha te tan thung chuan valley luh theihna awmah chuan ralvenna tha tawk lo siam a, anmahni rawn run tum apiang te chu thawhlehna ni thlen hma loh atan an thaw titawp tura lo mal nghauh nghauh chu an tih tur a ni tih hrilh nawn an ngai lo.
Panjshir valley hi Kabul atanga hmar lam 80 kilometres (50 miles) Afghanistan ram laili Hindu Kush mauntain range north central Afghanistan a awm a ni a, mihring nuai khat vel awm anga ngaih a ni. Panjshir lui a luang tlang a, tlang chheng chhia leh vurin a bawh thin tlang hriam tak tak awmna anih avangin Taliban duh lo pawl National Resistance Front (NRF) te tan hian tan hmun khawhna rem chang tak a ni, NRF zingah hian anti-Taliban militia fighters leh Afghan sipai thin Taliban laka tlawm duh lo leh Taliban ten thi ngei tura an tih te an ni hlawm a. Heng mi te hian helai ram bial Taliban fighter te laka tlawm ve lo tura venghim turin chhia an chham hial reng a, Islamist group Taliban te hian an fighters te chu Panjshir ram hual beta hneh chhuh erawh an tum viau thung a ni. A hming awmzia hi "sakeibaknei panga" (panj = panga, shir = sakeibaknei) tihna a ni.
"Kan unau te nen hian theih tawp chhuaha Panjshir te harsatna sukiang tura inbiak kan duh a, kan tum bawk a, mahse heng kan tumna zawng zawng hi a hlawhchham fai vek a ni," tih senior Taliban official Amir Khan Muttaqi chuan twitter audio message hmangin Panjshir mipuite hriat turin a dah chhuak a ni.
"Thu hmanga chin fel kan tumnain awmzia a neih theih tak loh avangin Mujahiddin (Taliban fighters) te chuan Panjshir hi an hual a tul ta a ni, he ram bial chhungah hian an harsatna te tharum hmang loa chinfel duh lo an awm tlat vang a ni. Tunah chuan inbiakna nei chungchang hi chu an kuta awm a ni ta," tih chu Taliban hotu ten Panjshir mipuite hnena an thu chah a ni.
"Hei hi erawh lo hrilh hram teh u, indo duh tlat te hnenah hian zahngaihna chhe te pawh lantir kan tum lo, a tawk ta e," tih chu Bismillah Mohammadi, Afghanistan defence minister in thla hmasa lam Kabul sorkar tluk chhiat hmaa a sawi a ni. Tun Thawhlehni zan khan Taliban fighter te hian an sawi lawk ang ngeiin Panjshir chu lak tumin an va bei ta chat reng a ni.
"Nizan khan Taliban terrorists te chuan Panjshir ho an bei a, mahse an rin chu a ang lo khawp ang, hneh loh an beih avangin an tlawm a ni," Mohammadi chuan Nilaini khan twitter ah sawiin Taliban 34 an thah bakah 65 an hliam bawk a ti.
"Kan mipui tan lungkham tur a awm lo, hliam nasa tak tuarin an tawlh kir leh ta a ni," tih thu helai tualchhung mi Panjshir tana ral veng tura thawk chhuak chuan a sawi, tualchhung mi tam tak te hi kum 1996- 2001 chhunga Taliban ten Afghanistan ram an awp chhung pawh khan ral an lo do tawh a ni. He Panjshir tualchhung mi hian a sawi zel dan chuan, "Kan thisen far tawp rak thlenga inveng turin kan inring vek a ni". Midang pakhat sawi ve dan chu, "mi tupawhin silai an nei a, ral do mai thei turin an inring vek a ni." Midang leh sawi chuan "Naupang ber atanga upa ber thlengin Taliban beihna lo dan tur chungchang chu an ngaihtuahin an vei ber a ni."
August 30 zanlaia US thlawhna hnuhnung Kabul airport atanga Afghanistan a chhuahsan zan pawh khan Panjshir hi Taliban hian hmun hnih atangin an bei nghal a -- khawthlang lama Khawak pass leh chhim lam Shotol ah te, tih thu Panjshir tualchhung mi pakhat chuan a sawi
Post a Comment