Tunlaiin Biden Admin chu Afghanistan chungchangah an chet chhiat avangin, US President hlui Donald Trump chuan thawm riva thar leh vung thar a rawn chhuah mek a, US media hrang hrangah Trump-an President Biden-a Foreign Policy hlawhchham chungchanga a sawiselna leh tawngkam chhuak hriata hmuh tur a tam chho hle. Trump hian kum 2024-ah US President chuh turin leh White House luaha "Commander-in-Chief" a nih tum hi chiang kelkawlhin a la sawi chiahlo nain, nakuma US mid-term election-ah Grand Old Party (Republican) an chak ngei theih nan, State hrang hrangah campaign tan chhovin, Republican Party National Convention Comtt Level-ah pawh, kum 2024 thlir chungin Conservative mi leh sa phusa tur deuh an inremchho mek a, chung chuan Donald Trump tan kawng an lo sial tura ngaih a ni.
Politico-in a ziak danin, Trump-a Campaign Advisers zinga mi, Jason Miller chuan kum 2024-ah chuan Donald Trump chuan White House luah tura rawn come-back a tum chiang ngei a ni, tihfiah nan 99%-100% tiin a sawi hial a, hetiang a lo nih chuan GOP atanga President chuh tumtu thenkhat chuan US Presidential Election lo awm tur atan ticket chan tuma Primary Election bei lova Donald Trump tan kawng ken mai an tum niin, media thenkhatah an ziak bawk.
Donald Trump hian tun hnaiah US national media-ah interviews nei fovin, press-statement a tichhuak zauh zauh reng a ni. Political Analyst te chuan hetianga Nov. 2020 Joe Biden-an ring chhung atanga hneha a thehchhuah khan, a la tlawm reng reng lova, kum 2024-ah rematch neiin Biden chu ring chhung atanga binchhuah ngei tumin, theihtawpin hma thar a la reng a ni, an ti. Trump hian White House luah leh ngei a tumna hi GOP lamin midterm election-ah Senate emaw, House emaw, Congress chambers pahniha an chak dan a zirin a hril dawn a ni. Trump hian Iowa leh Florida state-ah thawm lian tak neih a tum mek. Iowa state-ah hian Political Action Comtt (PAC) hmalakna angin amah tantu (pro-Trump) te chuan American mipui rilru chawk tho turin, "America First conservative values" rawn vawrh thar an tum dawn a ni.
Ohio state Rep. Jim Jordan chuan, Trump chuan 2024-ah President a chuh leh ngei ang, nimin maiah kan inbia a, hetianga Afghanistan-a thil nuihzathlak tak a thlen hnuah, rawn kir tura a inpeih thu a sawi a ni, a ti.
Kum 1892-ah President Grover Cleveland chu President a rawn ni zawk a, amah chauh chu a office rawn luahlehtu awm chhun a ni a, Trump hian White House a rawn luah leh thei a nih chuan kum 78 mi a lo ni tawh ang a, President Ronald Reagan-an term 2 a chelh hnua office a chhuahsan hnu aiin a upa zawk dawn a ni.
Donald Trump hian kumin 2021 a thla 6 chhung lekin, political committee 3 atangin US$ maktaduai 82 zet a tuak ngah der tawh a, Conservative media lar Sean Hannity/Fox News leh Rightwing media One America News (OAN) Network-ah an rawn vawrh lar chho leh hle tawh a ni.
Tony Fabrizio, Trump-a "Save America" tih Polls titu chuan, Trump chuan a dik emaw diklo emaw, inthlanah vote tihchingpen diklo tak vanga paihthlakah a inngai a, a thinrim a ni, a ti. President Biden chuan Trump-a Foreign Policy hlawhtling tak chu engah lo (mess)-ah chantirin, Kabul atanga mualpho taka US sipaite inlakchhuah danah Trump-a lo ruahman lawk zui angin a insawi a, hei hian Trump rilru a hliam zual niah an ngai.
President Biden-an White House - Rose Garden atanga American mipui leh khawvel hriata thupuan a neih hma lawkin, US sipaite chu Kabul airport-ah mi 13 chu thihchilh bomb vanga an thih chungchangah video thuchah tichhuakin, "Hetianga chhiatna rapthlak hi a thleng tur a ni lova, hetiang hi a thleng ngai tur a ni lova, in President chu ni ila a thleng ngai lovang" a ti a ni. Trump-a Campaign Team (PAC) te chuan President Biden-a chu Air Force One thlawhnaa a lawnchho tur, taksa chakloh vanga a tlusual palh tep chu nuihza (poked fun) atana siamin, "Hotupa ber tlawmna" (surrendered-in-chief) tiin an tilang a ni.
Donald Trump chuan Kabul airport US sipai thi chhungte (Gold Star families) te thlamuanna thuchah sawiin, sipai thi Nu (mother) Shana Chappell hnenah, "President chu ni ila chuan, i fapa duhawm leh mawi tha tak Kareem chu tunah i bulah a awm ang..." tiin a hrilh a ni. Shana Chappell hian Facebook-ah Biden thiltih dan sawiselin, a ziak a ni. Sipai ruangte hi Dover Air Force Base, Delaware state-ah President Biden te nupain an lo dawng sawng a ni.
TRUMPUIA LUNG A DAM THEI MAWLH LO!
Business Standard-in a ziak danin, President lui Donald Trump chuan President Biden-an Afghanistan atanga US sipai a lak chhuah (withdrawl) dan chu nasa taka dem leh sawiselin, "Hetiangin indona history atan Afghanistan atanga thalo tak (badly or incompetently) in American hote lak chhuah ngai tur a ni lo, tiin US mipui chhiah pekkhawm US$ tluklehdingawn 85 man zet mai chu an raldo ber Taliban kutah an dah/ pe maite chu a sawisel a. US kutah bungrua zawng zawng (all equipment) te hlan/ pe let tura phut tur a ni, a ti.
Donald Trump khan Afghanistan chungchanga palai bik a ruat leh US sipaite kohkir dan tura ruahmantu bera a dah, Special Representative for Afghan Reconcialition Zalmay Khalizad chu President Biden chuan midang ruat lovin, a hmang zui a ni. Trump a Khawnbawl Upa zinga mi, Secy of State Mike Pompeo chuan Biden-a thiltih dan chu a dem hle bawk a. Nikky Haley, US Ambassador to UN thin pawhin, Biden thiltih dan chu thil zahthlak tawpkhawk a ni, tiin America khualehtuite chu mi firfiak (terrorist) kuta hnuchhiahah puhin, Biden-a Foreign Policy chu America tana chhiatna nasa tak thlentir thei a ni, a ti. Rep. Mark Green chuan, President chaklo tak Biden-a hruaina hnuaiah harsatna namenlo kan tawk a. Kan Commander-in-Chief ber chuan Anericans, Afghan kan thawhpuia min puitu leh thian thate leh NATO kan thawhpuite a phatsan a ni, a ti bawk.
TRUMP-A FAMILY, SR. AIDES-TEN KOH LUIHNA AW AN HRE MAI THEI
Jan. 6-a US Capitol a Trump-a thlawptute pawngtal chiamna chu US House, Democrat thunun chuan a chhui ta zel a. He chhuitu pawl Comtt-a hotu atan Republican House member zinga President Donald Trump sawisel reng mai leh, impeachment-ah pawh vote petu Liz Chenney chu kaihhruai turin Speaker Nancy Pelosi chuan a ruat ta. Liz Chenney hi President George W. Bush hun laia US Vice President thin Dick Chenny fanu a ni a, Republican House Minority-ah Top 3 rank luahtu a ni a, mahse, anti-Trump a nih avangin leh a sawisel nasa thin vangin Republican Party hian a nihna an hlihsak a, mahse, Democrat lamin an chawisang ve ta thung a ni.
He Jan. 6-a thil thlen dan chhuitu House Select Comtt chuan, Sept 9 hmain US Federal Agencies 8 te chu Dec. 1,2020 - Jan.20, 2021 chhunga President Donald Trump-a thlawptute leh Trump Admin te inbiakna reng reng, National Archives and Records Admin tana documents leh inbiakna kal velte an hnena thehlut vek turin a hriattir ta. Hei hian Electoral College vote chungchang te leh Jan. 6 a Capitol a punkhawm leh tharum thawhna chhuah dan chhuina a ni. Mi tam tak chuan President Trump-a fuihpawrh vang a ni, an ti.
Federal Agencies zingah - Justice, Defense, FBI, National Counter - terrorism Center te pawh tel vekin, President Trump leh Vice President Mike Pence leh Secy of State Mike Pompeo te inkawmna leh inbiakna te pawh telh vek tur a ni.
NBC News sawi danin, Rep. Bennie Thompson (Democrat of Miss.,) Chairman of Bipartisan Comtt chuan, mi 30 dawn te chu Dec. 1 leh Jan. 20 inkara inbiakna te hriat an duh tih sawiin, Trump-a te chhungkua, a fanu Ivanka Trump, Eric Trump, Donald Trump Jr., First Lady Melania Trump, tin, Trump-a mi rin kai a Ukil Rudy Guiliani, Mark Meadow-Trump Chief of Staff, White House Counsel Pat Cipollone, National Security Adviser hlui Gen. Michael Flynn leh White Chief Strategist Steve Bannon te telin, House Select Comtt chuah an thawhpui duhloh chuah koh luihna (subpoenas) thleng thei turin an sawi a ni.
Hetianga Jan. 6 a thil thlen dan chhui zui chiam hi Republican lam chuan thil tul lo, hun kal tawh a ni, tiin an duh lova. Democrat hote hmanraw chi khat, mid-term election tin zawna intihthaihna (intimidated) thiltihah an puhsak a ni.-CT LALRINAWMA
Post a Comment