Aizawl, August 5, 2021 : Home Minister Pu Lalchamliana’n Mizoram leh Assam ramri chungchangah tharum thawhna hmanga buaina chinfel chu thil tha ber a ni lo a, thian anga in ena, inrem taka dawhkan kila sawiho a pawimawh ber a ti.
Nimin khan state pawn chanchinbu mi ten an kawmnaah he thu hi sawiin Home Minister chuan rilru tluang tak put tawn chuan State pahnih inkara inremlohna chinfel a nih theihloh nachhan tur a awm lo a ti a. Home Minister chuan boruak ralmuang a awm leh chu an duh ber a nih thu a sawi a, kar kalta thawhtannia State pahnih inkara buaina thleng avanga nunna chan an awm chu pawi a tih thu leh nunna chan tate chhungte zawng zawng thinlung taka a tawrhpui thu sawiin Mizoram leh Assam lama hliam tuar zawng zawngte tha taka an damchhuah vek theihnan duhsakna a hlan a ni.
Vawiin hian Mizoram leh Assam ramri buainaah remna leh muanna a awm theih nan Assam sawrkar tirh Cabinet Minister 2 an lokal dawn a, Mizoram lam atangin Home Minister Pu Lalchamliana leh RD Minister Pu Lalruatkima ten an lo dawngsawng ang.
Ramri- a July ni 26 inkahna thlen hnuah state pahnih te inbiakna felfai tak ala awm theilo a, Assam Chief Minister chuan nimin tlai khan twitter kaltlangin Assam Cabinet Minister 2 -Atul Bora leh Ashok Singhal te Mizoram ah remna a thlen theih nan an kal tur thu sawiin nimin khan Mizoram Chief Minister Zoramthanga chuan twitter kaltlang bawkin Mizoram Minister ten an lo dawnsawn tur thu a sawi bawk a ni.
Ramri chungchang inbiakna hi vawiin dar 11 ah Aijal Club ah neih tur a ni a, Mizoram lam hi Minister 2 bakah Home Department Secretary Vanlalngaihsaka’n a telpui dawn a ni.
Post a Comment